თბილისის რამდენიმე ბაგა-ბაღში ამ წუთებში ფინანსური პოლიციის თანამშრომლები და სურსათის ეროვნული სააგენტოს მუშაობენ. როგორც "პირველებს" ეუბნებიან, სეს-ის წარმომადგენლები ყველა საკვებს ლუქავენ, იმის გასარკვევად, თუ რამ გამოიწვია ბავშვების და პედაგოგების ინტოქსიკაცია.

მინიმუმ 20 ბაღში მოწამლულია 50-ზე მეტი მოზარდი.  საავადმყოფოებში შეყვანილ მოზარდებს ერთნაირი სიმპტომები აქვთ. რა გახდა ბავშვების ინტოქსიკაციის მიზეზი - ეს ახლა გამოძიებამ უნდა დაადგინოს.

ბაგა-ბაღების სააგენტოს ცნობით, 7 ბაღში, სააღმზრდელო პროცესი ეპიდემიოლოგიური რისკების დაზღვევის მიზნით შეჩერდა.

• ფინანსთა სამინისტროს საგამოძიებო სამსახურმა თბილისში მდებარე 20 ბაგა-ბაღში 55 აღსაზრდელისა და 1 აღმზრდელის ინტოქსიკაციის ფაქტზე გამოძიება დაიწყო.

ინტოქსიკაციის გამო "პირველების" ინფორმაციით, შემდეგი ბაღები დაიკეტა: 

• 59-ე, 124 -ე, 22-ე, 109-ე, 46 -ე, 121-ე, 79-ე.

ირკვევა, რომ ჩხრეკა, მთელი ღამის განმავლობაში ინტენსიურად მიმდინარეობდა 4 ბაგა-ბაღსა და ბაგა-ბაღებისთვის საკვები პროდუქტების მიმწოდებელ 3 კომპანიაში. ამ ეტაპზე არსებული ინფორმაციით, ინტოქსიკაცია შესაძლოა ბაქტერიულ ინფექციას უკავშირდებოდეს, რომლის წყაროც, სავარაუდოდ, ბაგა-ბაღებში მიღებული საკვები პროდუქტია. კონკრეტულად რომელი პროდუქტი გახდა ინტოქსიკაციის გამომწვევი მიზეზი, შესაბამისი ექსპერტიზის შედეგად დადგინდება.