პოლიცია „კავკასიის უნივერსიტეტის“ სტუდენტების სავარაუდო ინტოქსიკაციის ფაქტს იძიებს

05.10.26 12:18
პოლიცია „კავკასიის უნივერსიტეტის“ სტუდენტების სავარაუდო ინტოქსიკაციის ფაქტს იძიებს

შინაგან საქმეთა სამინისტრომ „კავკასიის უნივერსიტეტის“ სტუდენტების სავარაუდო ინტოქსიკაციის ფაქტზე გამოძიება დაიწყო.

  • გამოძიება „სისხლის სამართლის კოდექსის“ 124-ე მუხლით მიმდინარეობს, რაც გაუფრთხილებლობით ჯანმრთელობის ნაკლებად მძიმე ან მძიმე დაზიანებას გულისხმობს.

სასწავლებლის დამფუძნებელი კახა შენგელია "პირველებს" უდასტურებს, რომ დაკითხვაზე ისიც იყო მისული.

უნივერსიტეტის მინიმუმ სამი სტუდენტი კლინიკაში „კავკასიის უნივერსიტეტში“ გამართულ Welcome Party-ის შემდეგ გადაიყვანეს.

ვრცელდება არა ერთი ვერსია, მათ შორის სტუდენტების ჯგუფებში, რომ შესაძლოა, ადგილი ჰქონდეს განზრახ მოწამვლას.

შენგელია მიზანიმართულად, განზრახ მოწამვლის ფაქტს გამორიცხავს. 

"მოხდა ზედოზირება, განზრახ მოწამვლას ადგილი არ ჰქონია, ეს ინფორმაცია მივაწოდე გამოძიებასაც"- თქვა მან. 

განახლაბა: 

კავკასიის უნივერსიტეტის ოფიციალური განცხადება რამდენიმე წუთის წინ გამოქვეყნდა, რომელსაც "პირველები" უცვლელად გთავაზობთ: 

"კავკასიის უნივერსიტეტი ეხმაურება უნივერსიტეტის ტერიტორიაზე გამართული პირველკურსელთა წვეულების შესახებ მედიასა და სოციალურ ქსელებში გავრცელებულ ინფორმაციას.

გვინდა, მკაფიოდ განვაცხადოთ, რომ უნივერსიტეტის ტერიტორიაზე სტუდენტების სავარაუდო მოწამვლის ან სხვა სახის მასობრივი ინტოქსიკაციის შესახებ გავრცელებული ინფორმაცია არ შეესაბამება სიმართლეს.

ღონისძიების მიმდინარეობისას რამდენიმე სტუდენტს აღენიშნა ალკოჰოლური თრობის შედეგად გამოწვეული შეუძლოდ ყოფნა, რის გამოც მათ შესაბამისი სამედიცინო დახმარება აღმოუჩნდათ. სტუდენტების ჯანმრთელობას საფრთხე არ ემუქრება.

კავკასიის უნივერსიტეტი თანამშრომლობს შესაბამის უწყებებთან და საჭიროების შემთხვევაში მიაწვდის მათ ყველა შესაბამის ინფორმაციას. აღნიშნულთან დაკავშირებით გაკეთდება შსს-ს ოფიციალური განცხადებაც.

მოვუწოდებთ მედიას და საზოგადოებას, არ გაავრცელონ დაუზუსტებელი ინფორმაცია და ვარაუდები დადასტურებულ ფაქტებად, რადგან მსგავსი ცნობები უსაფუძვლოდ აზიანებს როგორც სტუდენტების, ისე უნივერსიტეტის რეპუტაციას"- აცხადებენ უნივერსიტეტში. 

მსგავსი სიახლეები