რუსთაველის გამზირის კონტრაქტორი კომპანია "სმარტ სოლუშენსი" მერიამ მეთერთმეტედ დააჯარიმა.

ამჯერად კომპანია „სმარტ სოლუშენს“ ფულადი ჯარიმა წინა შემთხვევების მსგავსად - სამუშაოების 24-საათიან რეჟიმში შესრულების ვალდებულების დარღვევის გამო დაეკისრა. როგორც სახელმწიფო შესყიდვების ვებგვერდზე გამოქვეყნებული ჯარიმის წერილიდან ირკვევა, ფულადი სანქციის ოდენობა კვლავ 1 583 ლარია. აღნიშნულ საჯარიმო წერილში განმარტებულია, რომ 2026 წლის 27 სექტემბერს (06:33 საათზე) განხორციელებული ინსპექტირების დროს, ბესიკის ქუჩიდან-თავისუფლების მოედნამდე არსებული მონაკვეთის სარეაბილიტაციო სამუშაოები 24-საათიან რეჟიმში არ მიმდინარეობდა.

უფრო კონკრეტულად:

• პირველ მონაკვეთზე, რომელიც ბესიკის ქუჩიდან თავისუფლების მოედნამდე ვრცელდება, ხელშეკრულება №01.01.01/30/190 2026 წლის 10 ივლისს გაფორმდა და მისი ღირებულება 7 916 674.67 ლარს შეადგენს. ინფრასტრუქტურის სამსახურის №14-01262081344 დავალებით კომპანიას სამუშაოები 24 საათში უნდა ეწარმოებინა, თუმცა 27 სექტემბერს, დილის 06:33 საათზე ჩატარებულმა ინსპექტირებამ პროცესის შეჩერება დააფიქსირა. ამის გამო კომპანიას №14-0126272416 წერილით ხელშეკრულების ღირებულების 0.02%-იანი ჯარიმა, 1 583.34 ლარი დაეკისრა.
• მეორე მონაკვეთზე, სავაჭრო ცენტრ „მერანიდან“ ბესიკის ქუჩამდე, მოქმედებს №01.01.01/30/189 ხელშეკრულება, რომლის ბიუჯეტი 5 778 105.16 ლარია. 24-საათიანი რეჟიმით მუშაობის დავალების მიუხედავად (წერილი №14-01262081376), 27 სექტემბერს, დილის 08:00 საათზე ინსპექტირებამ კვლავ დარღვევა გამოავლინა. შედეგად, №14-01262722440 ოფიციალური წერილით კომპანიას 1 155.63 ლარის ჯარიმა დააკისრეს.
• მესამე მონაკვეთი თ. ჭოველიძის ქუჩიდან „მერანამდე“ (მ. კოსტავას ქუჩისა და რუსთაველის გამზირის მონაკვეთი) მოიცავს №01.01.01/30/188 ხელშეკრულებას, რომლის ღირებულებაც 6 525 272.62 ლარია. №14-01262081387 დავალების დარღვევა 27 სექტემბერს, დილის 08:09 საათზე დაფიქსირდა, რის გამოც №14-01262732486 წერილით გამოწერილმა ჯარიმამ 1 305.06 ლარი შეადგინა.

პოლიტიკოსები და საკითხის ექსპერტები ამბობენ, რომ სინამდვილეში საქმე კონტროლის იმიტაციასთან გვაქვს და აღნიშნული ჯარიმები კონტრაქტორი კომპანიისთვის ზღვაში წვეთია. 

"ლელო-ძლიერი საქართველოს" ერთ-ერთი ლიდერის, ნიკა ჩერქეზიშვილის თქმით, რეალურად, მერია და სმარტ-სოლუშენი "ძალიან შეხმატკბილებულად მოქმედებენ"

უკვე 11 ჯარიმა არის გამოწერილი და ეს ხელშეკრულების მთლიანი ღირებულების 19,8 მილიონი ლრის მხოლოდ 0,08%-ია. მიზერული პროცენტია. გასაგები რომ იყოს, 100 ლარიან კონტრაქტზე სულ 8 თეთრით არის დაჯარიმებული  11 ჯარიმის შემთხვევაში. რა თქმა უნდა, ეს კომპანიისთვის არანაირ პრობლემას არ წარმოადგენს. ამით ქმნიან კონტროლის იმიტაციას, რომ თითქოს რაღაცა კონტროლი მიმდინარეობს. რეალურად, ძალიან შეხმატკბილებულად მოქმედებენ თბილისელების დაზიანების ხარჯზე", - აცხადებს ნიკა ჩერქეზიშვილი.