სუს-ის ყოფილი მაღალჩინოსნის, ლევან ახობაძის პროცესი გაურკვეველი მიზეზით გადაიდო

06.10.26 11:04
სუს-ის ყოფილი მაღალჩინოსნის, ლევან ახობაძის პროცესი გაურკვეველი მიზეზით გადაიდო

 

 

სახელმწიფო უსაფრთხოების სამსახურის ყოფილი უფროსის ყოფილი მოადგილის, ლევან ახობაძის პროცესი გაურკვეველი მიზეზით გადაიდო. 

ახობაძის ადვოკატი, რაჟდენ კუპრაშვილი ირწმუნება, რომ საქმე თაროზე არ შემოდებულა და სხდომის გადადების მიზეზად მოსამართლის სხვა პროცესს ასახელებს.

სხვა პროცესი დაედარა და მაგიტომ გადაიდო. მოსამართლეს ჰქონდა სხვა პროცესი. როდემდე გადაიდო არ ვიცით. (კითხვა - თაროზე ხომ არ შემოიდო ეს საქმე?) რა არის ახლა ეს, არ გიხდებათ. რა თქმა უნდა, სასამართლო სხდომაზე მივიდოდით, რას ქვია აპირებდა მისვლას. როდესაც ჩვენ ჩამოგვიყალიბდება ის ურთიერთობა, რომ თქვენს კითვებში იგრძნობა ურთიერთპატივისცემა, მერე ვითანამშრომლოთ", - განაცხადა რაჟდენ კუპრაშვილმა. 

ცნობისთვის, 1 ოქტომბერს, თბილისის საქალაქო სასამართლომ სახელმწიფო უსაფრთხოების სამსახურის უფროსის ყოფილი მოადგილე, კორუფციულ დანაშაულში ბრალდებული ლევან ახობაძე 500 000-ლარიანი გირაოს სანაცვლოდ სხდომათა დარბაზიდან გაათავისუფლა.

სუს-ის უფროსის ყოფილი მოადგილე ლევან ახობაძე სახელმწიფო უსაფრთხოების სამსახურის ანტიკორუფციულმა სააგენტომ დააკავა.

საქმის მასალების მიხედვით, სახელმწიფო უსაფრთხოების სამსახურის უფროსის ყოფილმა მოადგილემ, მეწარმეს შუამავლების მეშვეობით დახმარება აღუთქვა თანხის დაბრუნებაში, რის სანაცვლოდაც ქრთამის სახით 500 000 ლარი მოითხოვა, თუმცა საბოლოოდ 250 000 ლარის გადაცემაზე შეთანხმდნენ.

დაკავებულს ბრალდება საქართველოს სისხლის სამართლის კოდექსის 338-ე მუხლის მე-3 ნაწილის „ე" ქვეპუნქტით (მოხელის მიერ პირდაპირ ფულის მოთხოვნა და მიღება, რათა მოხელემ ქრთამის მიმცემის სასარგებლოდ განახორციელოს რაიმე ქმედება და გამოიყენოს თავისი სამსახურებრივი ავტორიტეტი ანალოგიური მიზნის მისაღწევად, ჩადენილი განსაკუთრებით დიდი ოდენობით) წარედგინა, რაც სასჯელის სახედ და ზომად 11-დან 15 წლამდე თავისუფლების აღკვეთას ითვალისწინებს.