რუსეთის აეროპორტების შეფერხებით მუშაობამ Georgian Airways-ი, წელს $8 მლნ-ით დააზარალა - ამის შესახებ ქართული ავიაკომპანიის სამეთვალყურეო საბჭოს წევრმა თამაზ გაიაშვილმა "РБК რადიოსთან" ინტერვიუში განაცხადა.

მისი განმარტებით, ზარალის ერთ-ერთი მთავარი მიზეზი რუსეთის აეროპორტების მოულოდნელი დახურვაა, რაც უკრაინული დრონების თავდასხმებს უკავშირდება. შედეგად, ავიაკომპანიას თვითმფრინავების სათადარიგო აეროპორტებში გადამისამართება უწევს, რაც დამატებით ხარჯებთან არის დაკავშირებული. ამას ემატება საწვავის გაძვირება, მგზავრების მომსახურებისა და კომპენსაციების ხარჯები, ასევე ფრენების გახანგრძლივება.

„რთული პერიოდია ახლა - საწვავი გაძვირებულია, რაც ხარჯებს ზრდის, სათადარიგო აეროპორტები კი ავიაკომპანიისთვის კატასტროფაა. 2026 წლის განმავლობაში, ავიაკომპანიამ რუსეთში ფრენების შესრულებისას 8 მილიონი დოლარის ზარალი მიიღო.

სექტემბრიდან ჩვენ შევზღუდეთ რუსეთში ფრენები და კვირაში სამი სიხშირიდან 2-მდე შევამცირეთ, იქიდან გამომდინარე რომ რუსული აეროპორტები თითქმის ყოველ ღამეს იხურება, ჩვენი ავიაკომპანია კი სწორედ საღამოს ფრენებს სათადარიგო აეროპორტში ასრულებდა“, - განაცხადა გაიაშვილმა.

Georgian Airways-ის სამეთვალყურეო საბჭოს წევრი აცხადებს, რომ აეროპორტების რეგულარული არაგეგმური დახურვის გამო, ავიაკომპანია იძულებულია, სიტუაციის დასტაბილურებამდე რუსეთის ქალაქებში სამარშრუტო ქსელის განვითარების გეგმები შეაჩეროს. 

ამის მიუხედავად, Georgian Airways რუსეთში ფრენებს გააგრძელებს, თუმცა, გაიაშვილის თქმით, აეროპორტების მუშაობის სტაბილიზაციამდე ახალ მიმართულებებს აღარ დაამატებს. ავიაკომპანიამ რუსეთში ფრენები 2023 წლის მაისში განაახლა და რეისებს მოსკოვში, სანქტ-პეტერბურგსა და ნოვოსიბირსკში ასრულებს.