ქვეყანაში ახალმა პროტესტმა იფეთქა - სოციალური სააგენტოს თანამშრომლები გაფიცვას აანონსებენ

14.01.22 11:54
ქვეყანაში ახალმა პროტესტმა იფეთქა - სოციალური სააგენტოს თანამშრომლები გაფიცვას აანონსებენ

ქვეყანაში კიდევ ერთმა პროტესტმა იფეთქა.  სოციალური სააგენტოს თანამშრომლები ქუჩაში გამოსვლას და გაფიცვას აანონსებენ. სოციალური აგენტები ხელფასების მომატებას ითხოვენ. მათი თქმით, ანაზღაურება იმდენად მცირე აქვთ, რომ მალე სოციალურად დაუცველები თავად გახდებიან. სპეციალური განცხადებით მათ ჯანდაცვის სამინისტროს უკვე მიმართეს. 

სოლიდარობის ქსელის იურისტის, დავით თომსარაშვილის განცხადებით,  17 იანვრიდან მთელი ქვეყნის მასშტაბით 390 ადამიანი გაიფიცება. მისი თქმით, პროტესტი მოთოხვნების სრულად დაკმაყოფილებამდე გაგრძელდება. 

სოციალური მომსახურების სააგენტოს თანამშრომლებს ჰქონდათ და აქვთ კოლექტიური დავა სააგენტოსთან. ეს ადამიანები წლების განმავლობაში ითხოვენ ღირსეულ სამუშაო პირობებს და ღირსეულ ანაზღაურებას, თუმცა, სამწუხაროდ, როგორც მედიაციის პროცესი, ასევე შემდგომი მოლაპარაკებების პროცესი წარუმატებლად დასრულდა. სააგენტო ამდენი ხნის მანძილზე არასერიოზულად უდგება ჩვენს პროტესტს, რამაც შესაბამის შედეგამდე მიგვიყვანა.

გუშინ გავაგზავნეთ შეტყობინება, როგორც სააგენტოში, ასევე შეტყობინება გავუგზავნეთ მინისტრს, რომ 17 იანვრიდან სოციალური მომსახურების სააგენტოს 390 თანამშრომელი გაიფიცება, რაც ნიშნავს იმას, რომ უმეტესობა ცენტრებისა ფუნქციონირებას შეწყვეტს. ეს ადამიანები იფიცებიან მთელი ქვეყნის მასშტაბით. ჩვენ ვაგრძელებთ ბრძოლას, ვაგრძელებთ მოლაპარაკებებს, თუმცა ამ ადამიანებმა ერთხელ და სამუდამოდ უარი თქვეს მონურ პირობებზე და ახლა უკვე მივმართეთ პროტესტის უკიდურეს ფორმას და გავიფიცებით იქამდე, ვიდრე ჩვენი მოთხოვნები არ იქნება შესრულებული.

რაც შეეხება მოთხოვნებს, ამ ადამიანების ერთ-ერთი უმთავრესი მოთხოვნაა ხელფასების 100%-ით მატება, იქედან გამომდინარე, რომ ეს ადამიანები წლების განმავლობაში მუშაობენ ისეთ ხელფასზე, რომლითაც არსებობა შეუძლებელია. ზოგიერთ შემთხვევაში იღებენ უფრო დაბალ ანაზღაურებას, ვიდრე სოციალურად დაუცველი ადამიანები იღებენ დახმარებას. ეს ადამიანები ითხოვენ ტრანსპორტის ხარჯებს. მათ უწევთ გადაადგილება საქართველოს მასშტაბით და თავისი ჯიბიდან უწევთ ტრანსპორტის ხარჯების გადახდა. ასევე, პროფკავშირი ითხოვს კოლექტიური ხელშეკრულების გაფორმებას. ითხოვენ, რომ ყოველწლიურად მათი ხელფასი ინფლაციასთან მიმართებით გაიზარდოს. ასევე, ეს ადამიანები ითხოვენ ღირსეულ სამუშაო პირობებს, როგორიცაა დაზღვევა და ასე შემდეგ. დაახლოებით 12 წელია ამ ადამიანების ხელფასი არის უცვლელი. სოციალური აგენტების ფიქსირებული ხელფასი ეს არის 200 ლარი ხელზე ასაღები და შემდგომ გამომუშავებით. სამწუხაროდ, მოლაპარაკებები ჩიხში შევიდა, როცა შევიტყვეთ, რომ მინისტრი გადადგა. ვითხოვდით კომუნიკაციას, თუმცა ამის შემდგომ კომუნიკაცია ფაქტობრივად შეწყდა", - განაცხადა სოლიდარობის ქსელის იურისტმა, დავით თომსარაშვილმა.

ჯანდაცვის მინისტრს პროტესტის შესაჩერებლად დრო ორშაბათამდე აქვს, სხვა შემთხვევაში კვირის დასაწყისში  ქვეყანაში ახალი პროტესტის კერა გაჩნდება.