პრემიერის მიერ გაჟღერებული განცხადებიდან 24 საათში, საპატრიარქო საგანგებო განცხადებას ავრცელებს და თბილისი პრაიდის კვირეულს ეხმიანება.

საპატრიარქო ამბობს, რომ დროულია "ამ პრობლემის" საკანონმდებლო გზით მსჯელობა გაიმართოს.

განცხადების ავტორები პრემიერის რიტორიკას იმეორებენ და ამბობენ, რომ ლგბტ პროპაგანდა დაუშვებელი და მიუღებელია.

ჩვენს ქვეყანაში გაუკუღმართებული ცხოვრების წესის დანერგვის მცდელობა, სამწუხაროდ, არ წყდება. ამაზე მოწმობს მიმდინარე წლის ივლისში დაანონსებული ,,ლგბტ კვირეული", რომელსაც, მისი მიზნებიდან გამომდინარე, არ შეიძლება თავისი უარყოფითი გავლენა არ ჰქონდეს თუნდაც დახურულ სივრცეში გამართვის დროს.
▪️ მიგვაჩნია, რომ ლგბტ პროპაგანდა დაუშვებელი და მიუღებელია, მით უფრო, ქვეყანაში, რომელსაც მრავალსაუკუნოვანი კულტურა და ქრისტიანული ფესვები აქვს. 
პროპაგანდის ნებისმიერი სახით გამოვლინება მოზარდებში კი მათ ცნობიერებაზე ძალადობაა.
▪️ საქართველოს მოსახლეობის უდიდესი ნაწილის არაერთგზის გამოთქმული პროტესტის უგულებელყოფა არის მისი უმთავრესი ფასეულობების უპატივცემულობა და მკაფიო გამოხატულება მორალური ზიანის მიყენების მცდელობისა.
▪️ ყოველი მსგავსი აქტივობა, გარდა ცოდვის პროპაგანდისა, არის სამოქალაქო დაპირისპირებისა და დაძაბულობის მიზეზი. დასკვნის გამოტანა ადვილია, თუ დავაკვირდებით დაანონსებული
ლგბტ ღონისძიებების კვირეულის განმავლობაში საზოგადოებაში მომატებულ პოლარიზაციას.
▪️ მიგვაჩნია, რომ საჭიროა მსგავსი დაძაბულობის ფაქტორების საწყის ეტაპზევე მკურნალობა.
▪️ საქართველოს მართლმადიდებელი ეკლესია უკანასკნელ წლებში გამუდმებული თავდასხმის, ცილისწამებისა და შეურაცხმყოფელი კამპანიის ობიექტია, თუმცა არც ერთხელ არ ყოფილა ჩვენი მხრიდან მოთმინების დაკარგვის შემთხვევა. ასეთ დროს ეკლესია მუდამ შემოიფარგლება მხოლოდ ცილისწამების მხილებით. 
▪️ ეკლესია არასდროს მოუწოდებს ძალადობისკენ, პირიქით, მოსახლეობაში სიმშვიდის შენარჩუნებისთვის ზრუნავს. ამიტომ დღეს შეიძლება განსაკუთრებულად დროული იყოს მოწოდება საზოგადოებისადმი, გვემსჯელა საკანონმდებლო გზით ზემოაღნიშნული პრობლემის დარეგულირების შესახებ". - ნათქვამია განცხადებაში.

პრემიერ-მინისტრ ირაკლი ღარიბაშვილის თქმით, უნდა გაიხსნას დებატები და ხელისუფლებამ მიიღოს გადაწყვეტილება, რა პოზიცია აქვს „ლგბტ პროპაგანდაზე“. ღარიბაშვილი საკითხის საკანონმდებლო დონეზე დარეგულირებას არ გამორიცხავს.

ირაკლი ღარიბაშვილმა პარლამენტში თქვა, რომ ევროპაში და ამერიკაში „ლგბტ პროპაგანდა“ ბაღებსა და სკოლებში შევიდა, მან „ამორალური კამპანიაის" წარმოებაში დაადანაშაულა „მაკდონალდსი“ და ღარიბაშვილი სულაკაურის გამომცემლობას “ლგბტ პროპაგანდაში” ადანაშაულებს.