თუ პარასკევამდე პრემიერი ღარიბაშვილი და ჯანდაცვის მინისტრი არ იტყვიან, მიიღებენ თუ არა სექტემბერში აქონდროპლაზიის დიაგნოზის მქონე ბავშვები მედიკამენტ "ვოსორიტიდს” ვერ მიიღებენ, დედები უწყვეტ აქციებს გააგრძელებენ. 

ულტიმატუმი ოცნების ხელისუფლებას  მშობლებმა რამდენიმე წუთის წინ მთავრობის ადმინისტრაციიდან წაუყენეს. იშვიათი დაავადების მქონე პაციენტების ოჯახები ამბობენ, რომ მათ სხვა გზა არ დაუტოვეს. მშობლებს აქვთ ეჭვი, რომ ჯანდაცვის სამინისტრო დროს შეგნებულად აჭიანურებს. 

მშობლები მოითხოვენ, პროცესი არაუგვიანეს 30 სექტემბრისა უნდა დაიწყოს. მათივე თქმით, იმ შემთხვევაში, თუ 5-დღიანი ვადის ამოწურვის შემდეგ პასუხს ვერ მიიღებენ მთავრობისგან, მათი 24-საათიანი პროტესტი გაგრძელდება.

„პარასკევამდე ვთხოვთ მთავრობას, ჯანდაცვის სამინისტროს, დაგვისახელოს გონივრული ვადა, თუ როდის შეძლებენ, რომელი თვიდან დაიწყებენ ბავშვები მკურნალობას“,-  განაცხადეს აქონდროპლაზიის მქონე ბავშვების მშობლებმა. 

ერთ-ერთმა მშობელმა, ეკა ჭონქაძემ პრემიერ-მინისტრს მიმართა პროცესში აქტიურად ჩაერთოს: 

მინდა, მშობლების თხოვნით პრემიერმინისტრს მივმართო, რომ ამ პროცესში ჩაერთოს და დააჩქაროს. ბავშვებს ეს წამალი აუცილებლად ესაჭიროებათ და მათ მედიკამენტი არაუგვიანეს სექტემბერში უნდა მიიღონ. თუ 28 ივლისს პასუხს არ გვეტყვიან, ჩვენ 24-საათიან პროტესტს ისევ გავაგრძელებთ", - ეკა ჭონქაძემ.

მშობლების თქმით, სამინისტროს 15-20 ივლისამდე პერიოდში უნდა დაემტკიცებინა აქონდროპლაზიის მართვის პროტოკოლი, თუმცა ამ დრომდე არათუ არ დაინიშნა საბჭო და არ დამტკიცდა პროტოკოლი, ისინი ვადის გადაცილებასთან დაკავშირებითაც არ გააფრთხილეს.

ჯანდაცვის სამინისტრო კი თავის მართლებაშია და ამტკიცებს, რომ პროტოკოლთან დაკავშირებით გაიდლაინის საბჭოს განხილვისა და გადაწყვეტილების მიღებისთვის ვადა 24 ივლისამდე განესაზღვრა.