საქართველოს პროკურატურამ, ადვოკატის მიმართ სასამართლოში საქმის განხილვასთან დაკავშირებით მუქარისა და ძალადობის ფაქტზე, ორ პირს მათ შორის ერთ არასრულწლოვანს ბრალდება წარუდგინა.

"შინაგან საქმეთა სამინისტროს მიერ ჩატარებული გამოძიებით დადგინდა, რომ 7 დეკემბერს, თბილისის საქალაქო სასამართლოში, სასამართლო პროცესის დასრულების შემდეგ, ორმა პირმა ბრალდებულის ადვოკატის მიმართ ფიზიკურად იძალადა, მათ შორის არასრულწლოვანი ადვოკატს სიცოცხლის მოსპობით დაემუქრა.

ერთ პირს ბრალდება საქართველოს სისხლის სამართლის კოდექსის 365-ე მუხლის მე-3 ნაწილით (ძალადობა დაცვის განხორციელებასთან და სასამართლოში საქმის განხილვასთან დაკავშირებით), ხოლო არასრულწლოვანს - საქართველოს სისხლის სამართლის კოდექსის 365-ე მუხლის მე-2 და მე-3 ნაწილებით (მუქარა და ძალადობა დაცვის განხორციელებასთან და სასამართლოში საქმის განხილვასთან დაკავშირებით)  წარედგინათ.

პროკურატურა ბრალდებულებისთვის  აღკვეთის ღონისძიების შეფარდების მოთხოვნით, თბილისის საქალაქო სასამართლოს კანონით დადგენილ ვადაში მიმართავს.

შინაგან საქმეთა სამინისტროში სისხლის სამართლის საქმეზე გამოძიება გრძელდება დანაშაულის ჩამდენი სხვა პირების დადგენის მიზნით." - ნათქვამია პროკურატურის განცხადებაში. 

საქმე ეხება ლილოში მომხდარი მკვლელობის საქმის განხილვას საქალაქო სასამართლოში, რა დროსაც დაპირისპირება მოხდა. 

ფიზიკურად უსწორდებოდნენ მკვლელობაში ბრალდებულის ადვოკატსაც და იმ მანდატურებსაც, რომლებიც ვითარების განმუხტვას ცდილობდნენ. რამდენიმე წუთის განმავლობაში ვითარება პრაქტიკულად უკონტროლო იყო. ანგარიშსწორებაში რამდენიმე ათეული ადამიანი მონაწილეობდა. ვითარება იმდენად დაიძაბა, რომ ადგილზე სასწრაფო დახმარების ბრიგადები გამოიძახეს. 

ლილოში მოკლული რომან ისაევის ახლობლები ბრალდებულისთვის უვადო პატიმრობას ითხოვდნენ.