ცესკოს ყალბი და საეჭვო ანგარიშების შესახებ ISFED-ის კვლევას პასუხობს - კალანდარიშვილის უწყება ირწმუნება, ყალბ პროფილებთან კავშირი არ აქვს და არც არასდროს ჰქონია.

ამასთან, ცესკო თავს არასამთავრობო ორგანიზაციას ესხმის და მას მიუთითებს, გამოიძიოს ის ყალბი ანგარიშებიც, რომლებიც, მათი მტკიცებით, უწყების წინააღმდეგ მუშაობენ. კალანდარიშვილის უწყება ISFED-ს მოუწოდებს "კეთილსინდისიერი ადკვირვების" სტანდარტით იხელმძღვანელოს. 

გუშინ, სოციალურ ქსელებში და მედია საშუალებებში გავრცელდა ორგანიზაცია ,,სამართლიანი არჩევნების’’ ე.წ. კვლევა სოციალური ქსელების ყალბ ან საეჭვო გვერდებზე, რომლებიც ჩართულნი არიან საარჩევნო ადმინისტრაციის სასარგებლო კამპანიაში. თავი რომ დავანებოთ ამ ე.წ. კვლევის „მასშტაბურობას“, სადაც საუბარია 7 ყალბ და 15 საეჭვო გვერდზე, მისი იმ დროს გამოქვეყნება, როდესაც საარჩევნო ადმინისტრაციაში მიმდინარეობდა საარჩევნო დავების განხილვის უმნიშვნელოვანესი პროცესი, საეჭვოს ხდის ორგანიზაციის რეალურ მიზანს და ცხადად მიუთითებს მის დაინტერესებაზე ნებისმიერი ფორმით და საშუალებით დააზიანოს საარჩევნო ადმინისტრაციის რეპუტაცია. ამ შემთხვევაშიც, ეს ანგარიში დაინტერესებულმა მხარეებმა გამოიყენეს იმგვარად, თითქოს ამ ყველაფრის უკან საარჩევნო ადმინისტრაცია დგას. 

საქართველოს საარჩევნო ადმინისტრაცია ცალსახად აცხადებს, რომ არანაირი კავშირი ე.წ. ყალბ და საეჭვო გვერდებთან არ აქვს, არც ჰქონია და მომავალშიც არ განიხილავს ამგვარ არაკეთილსინდისიერ მექანიზმებს თავის საქმიანობაში. 

სამართლიანობისთვის კარგი იქნეოდა, ორგანიზაციას იმავე ანგარიშში მიეთითებინა საარჩევნო ადმინისტრაციის წინააღმდეგ უტყუარად დადასტურებული ყალბი და საეჭვო გვერდების ორგანიზებული შეტევების ფაქტები, განსაკუთრებით, 2020 წლიდან, რასაც სათავე მათ მიერ არასწორად დათვლილი პარალელური დათვლის შედეგების გამოცხადებამ დაუდო.
 

ნაცვლად იმისა, რომ 2020 წელს პარალელური დათვლის არასწორი შედეგების გამოქვეყნების შემდგომ, ორგანიზაცია ,,სამართლიან არჩევნებს’’ 2024 წელს გამოექვეყნებინა პარალელური დათვლის შედეგები, რითაც ცალსახად დადასტურდებოდა 26 ოქტომბრის არჩევნების შედეგების სისწორე, იქმნება შთაბეჭდილება, რომ დღემდე, ისინი საზოგადოებაში მცდარი აღქმების დათესვას და ამით საკუთარი მოქმედების თუ უმოქმედობის გამართლებას ცდილობენ. 

ამასთან, ნათელი ხდება, რატომ არ მოაწერა აღნიშნულმა ორგანიზაციამ ხელი ცესკოსა და ადგილობრივ დამკვირვებელ ორგანიზაციებს შორის გაფორმებულ ქცევის (ეთიკის) კოდექსს, პირველად ბოლო წლების განმავლობაში. მითუმეტეს, რომ აღნიშნული კოდექსის შემუშავების ერთერთი მონაწილე და ინიციატორი თავად გახლდათ. 

საარჩევნო ადმინისტრაციისთვის მნიშვნელოვანია, რომ არჩევნების მთლიანობის უზრუნველსაყოფად განხორციელდეს მიუკერძოებელი და ობიექტური დაკვირვება საერთაშორისო კარგი პრაქტიკის გათვალისწინებით. შესაბამისად, მოვუწოდებთ სამართლიან არჩევნებს, დაუბრუნდეს კეთილსინდისიერი დაკვირვების სტანდარტს და იმოქმედოს მაღალი ეთიკური პრინციპების დაცვით, - ნათქვამია განცხადებაში. 

სოციალურ ქსელში აღმოჩენილია 7 ყალბი და 15 საეჭვო პროფილი. არაავთენტური ანგარიშები გიორგი კალანდარიშვილს აქებენ და ოპოზიციას ლანძღავენ. სხვის სახელებს და სხვის ფოტოებს ამოფარებული პირების სამიზნე გახდნენ ადგილობრივი დამკირვებლებიც, რომლებმაც თქვეს, რომ არჩევნები ქვეყანაში ტოტალური გაყალბებით ჩატარდა. 

ტროლების დაჯგუფება სოციალურ ქსელში ორგანიზაცია "სამართლიანმა არჩევნებმა" აღმოაჩინა. ირკვევა, რომ  ყალბი ანგარიშებიდან კომენტარები მხოლოდ ცესკოს გვერდზე არ იწერება. ოპოზიციას, სამოქალაქო აქტივისტებს, არასამთავრობოებს უწერენ, რომ 26 ოქტომრის არჩევნები ცესკომ ობიექტურად, ყველა წესის დაცვით და მაღალი სტანდარდით ჩაატარა.