ანთროპოლოგი ირაკლი ფიფია, რომელიც 2 დეკემბერს, სასტუმრო "მარიოტის" წინ დააკავეს, სპეციალური დანიშნულების რაზმებს განსაკუთრებულ სისასტიკეში ადანაშაულებს - ირაკლი ფიფია "ტვ პირველის" ეთერში ხელბორკილების დადების შემდგომ მასზე განხორციელებულ ძალადობას დეტალურად იხსენებს.

ანთროპოლოგის მონათხრობის თანახმად, საპროტესტო აქციაზე საკუთარი სამოქალაქო პოზიციის დასაფიქსირებლად იდგა, რა დროსაც საპოლიციო ძალებმა მოულოდნელად აიყვანეს და მანქანაში ჩატენეს. 

"გავიარე კორდონი, ლოცვის დაწყების დროს ცემა ორმაგად დამიწყო, მიყვიროდა და შეურაცხყოფას მაყენებდა" - ამბობს ირაკლი ფიფია და იქვე აღნიშნავს, რომ ძალადობრივი პროცესი 10 წუთის განმავლობაში გრძელდებოდა. 

სტაბილურად ვარ, ცოტა თავბრუს ხვევები მაწუხებს ხანდახან, მაგრამ მაინც ვახერხებ მშვიდი გარემოს შენარჩუნებას. რაც შეეხება იმ დღეს. არ ვეკუთვნი იმ ადამიანების რიცხვს, ვისაც შეუძლია ქვების სროლა და გინება. ვიდექი უბრალოდ ჩემი სამოქალაქო პოზიციის გამოსახატად, რომ დამეფიქსირებინა, რაც ხდება რეალურად, რაც გვაკადრეს მოქალაქეებს. იმ დღეს ადრე დაიწყო დარბევა, გაქცევაც არ მიცდია იმიტომ, რომ არაფერს არ ვაშავებდი. როცა წამიყვანეს, დაიწყო ფიზიკური შეურაცხყოფების კორიანტელი. მივხვდი, რომ შინაგანი ბალანსისთვის მჭირდებოდა, რომ მელოცა.

სამარშრუტო მანქანაში გადამიყვანეს, სადაც გავიარე კორდონი და იყვნენ სხვა ადამიანებიც და დაიწყო ჩვენი დაშინება. მე მაინც ვეცადე, რომ წონასწორობა არ დამეკარგა, ლოცვა დავიწყე, ვერ მიხვდა ის ადამიანი, რას ვაკეთებდი და როცა მიხვდა რომ ვლოცულობდი, ორმაგად გამეტებით დაიწყო ცემა და შეურაცხყოფა. მიყვიროდა. 

პროცესი გრძელდებოდა 10 წუთი პირველ მარშუტკაში, შემდეგ მეორეში გადაგვიყვანეს. ვიყავით სადღაც 9 კაცი, მეორე მარშუტკაში 2 ვიყავით. ზოგ ადამიანს ჯვარი ააწყვიტეს", - ამბობს ირაკლი ფიფია.