ბიძინა ივანიშვილი გიორგი ბაჩიაშვილს თავისუფლების სანაცვლოდ გარიგებას სთავაზობდა -  სკანდალური ამბავი დღევანდელ სასამართლო პროცესზე თანაინვესტირების ფონდის ყოფილმა ხელმძღვანელმა გაახმაურა.

ბაჩიაშვილმა თქვა, რომ ივანიშვილი დიდძალი რაოდენობის კრიპტოვალუტას ითხოვდა მისგან.

შემეძლო ივანიშვილთან გარიგებაზე წასვლა და ჩუმად ყოფნა, მაგრამ უარი ვთქვი ამაზე. აქამდე არც განმიცხადებია, ივანიშვილმა წარმომადგენლის მეშვეობით გამომიგზავნა წერილი, სადაც ითხოვს დიდძალი რაოდენობის კრიპტოვალუტას თავისუფლების სანაცვლოდ. პირდაპირ მითითებულია, რომ თუ დროულად არ დავაბრუნებ ამ კრიპტოვალუტას, მზარდი გრაფიკი არის მითითებული. "კრიმინალური სოჩიკი"
ჩამირთო ივანიშვილმა  და პატიმრობის მუქარა, რაც კიდევ ერთხელ ადასტურებს, რომ ეს სპექტაკლი რასაც დგამთ, არის პოლიტიკურად მოტივირებული და გამოძალვაა. ეს ხდებოდა წინა ხელისუფლების დროს და ეს ხდება ახლაც ამ სასამართლოს კედლებში", - განაცხადა ბაჩიაშვილმა. 

ამის შემდეგ თანაინვესტირების ფონდის ყოფილმა ხელმძღვანელმა "პირველებთან" დააზუსტა, რომ საუბარი იყო  5000 ბიტკოინზე, რომელიც ყოველ თვე უნდა გაზრიდილიყო.

5000 ბიტკოინის მოთხოვნა წინა შემოდგომას და ე.წ. კრიმინალური სოჩკი , რომ ყოველ თვეში ეს თანხა 500 ბიტკოინით გაიზრდებოდა. მისი წარმომადგენელემა გამოუგზავნა ჩემს ადვოკატს წერილი. ის არიოს ჩვეულებრივი ივანიშვილსი წარმომადგენელი და არა მისი ადვოკატი", - განაცხადა ბაჩიაშვილმა. 

რაც შეეხება სასამართლოს, ბაჩიაშვილი მოსამართლე გიორგი გელაშვილს პირდაპირ უთხრა, რომ უდანაშაულოა და ეს ყველაფერი მის დასჯას ისახავს მიზნად.

თქვენს წინაშე ვდგავარ სრულიად უდანაშულო ადამიანი, საერთოდ არ უნდა ვიმყოფებოდე ამ დარბაზში. ეს სასამართლო არ არის კანონიერებაზე დაფუძნებული - მიზნად ისახავს დასჯას და ფულის გამოძალვას იმისთვის, რომ ივანიშვილის ანტიდასავლური გზავნილები არ გავიზიარე. საქმეში არ არსებობს არცერთი მტკიცებულება რაც დაამტკიცებს ივანიშვილის ბრალდებებს.

სასმართლო პროცესი საქალაქო სასამართლოში რამდენიმე წუთის წინ დასრულდა. ხვალ პროცესი მტკიცებულებების გამოკვლევით განახლდება. 

გიორგი ბაჩიაშვილს “ქართული ოცნების” დამფუძნებლის, ბიძინა ივანიშვილის კრიპტოვალუტის მითვისებას ედავებიან. პროკურატურის მტკიცებით, საქმე ეხება 2017 წლის ქმედებას. კერძოდ, გამოძიების ცნობით, გიორგი ბაჩიაშვილმა ინვესტორს ჩადებული ინვესტიციიდან მიღებული სრული მოგების სანაცვლოდ, მხოლოდ 536 900 დოლარი გადასცა, ხოლო დარჩენილი, ინვესტორის კუთვნილი, 8 253.13 ოდენობის ბიტკოინი მართლსაწინააღმდეგოდ მიითვისა, რომლის ღირებულება მისი დაუფლების პერიოდში 39 215 820 დოლარს შეადგენდა. გასული წლის 6 ივლისს თანაინვესტირების ფონდის ყოფილ ხელმძღვანელს აღმკვეთი ღონისძიების სახით 2 მილიონ 500 ათას ლარიანი გირაო შეეფარდა. ამასთან, საქმის გამოძიების დასრულებამდე, მას ქვეყნის დატოვება აეკრძალა. რაც შეეხება ბაჩიაშვილის პოზიციას, როგორც მან განაცხადა, დანაშაული არასდროს ჩაუდენია და მისთვის გაურკვეველია, რატომ არის ამ პროცესში.