სინდისის პატიმრების გათავისუფლებისა და რიგგარეშე არჩევნების დანიშვნის მოთხოვნამ ყველა სფეროს წარმომადგენელი გააერთიანა - საპროტესტო შეძახილებით ქუჩებში როგორც სტუდენტები, ასევე პედაგობები, ხელოვანები, IT სპეციალისტები და რიგითი ადამიანები დგანან. 

ამჯერად მოქალაქეებს ქუჩაში გამოსვლისკენ და კრიტიკული ხმის გაჟღერებისკენ მსახიობი ეკა დემეტრაძე მოუწოდებს. როგორც ის "პირველებთან" ამბობს, კონსოლიდირებულ საზოგადოებაზე ძლიერი ვერც საპოლიციო რეჟიმი და ვერც ოლიგარქი იქნება. 

ძალიან მნიშვნელოვანია, რომ არ შეგვეშინდეს. როცა ბევრი ვართ და ერთად ვართ, ჩვენზე ძლიერი ვერ იქნება ვერც საპოლიციო რეჟიმი და ვერც ოლიგარქი", - ამბობს ეკა დემეტრაძე.

საქართველოში პროტესტის 58-ე დღეა - თბილისში ცხრა საპროტესტო მარში გაიმართება. მსვლელობები დაანონსებული სხვადასხვა პროფესიის ადამიანებს აქვთ. 

მარშები 15:00 საათზე დაიწყება. თავდაპირველად, მსვლელობა საფრანგეთის საელჩოდან ბრიტანეთის საელჩომდე გაიმართება. სწორედ ამ ფორმით შეეცდებიან მოქალაქეები სტრატეგიულ პარტნიორებს შეახსენონ, რომ ივანიშვილის რეჟიმზე წნეხის გაძლიერება საჭიროა.

ამასთან, 24 იანვარს მოქალაქეები სინდისის პატიმრების გათავისუფლების მოთხოვნით კვლავ გაერთიანდებიან. დაპატიმრებული მსახიობის მეგობრები და კოლეგები თეატრთან შეიკრიბებიან და მარჯანიშვილის მოედნიდან 19:00 საათზე მსვლელობას დაიწყებენ. 

პარალელურ რეჟიმში, მარშები ავლაბრის მეტროდან და თბილისის სახელმწიფო უნივერსიტეტის პირველი კორპუსის ეზოდან დაიწყება. ციხეში მოშიმშილე ჟურნალისტისთვის სოლიდარობის გამოსაცხადებლად მედიის წარმომადგენლები კი ეთიკის ქარტიის ოფისთან აპირებენ მისვლას. საბოლოო ლოკაცია კი პარლამენტი იქნება.