არასამთავრობო ორგანიზაციების წარმომადგენლებმა სტრასბურგში, სადაც ევროსაბჭოს საპარლამენტო ასამბლეაზე საქართველოს შესახებ მსჯელობენ, “ბათუმელებისა“ და „ნეტგაზეთის“ დამფუძნებელს, მზია ამაღლობელს სოლიდარობა გამოუცხადეს.

მესამე სექტორის წარმოამდგენლებმა ბანერები გაშალეს წარწერებით: „თავისუფლება მზია ამაღლობელს“; „თავისუფლება პოლიტპატიმრებს საქართველოში“.

სოლიდარობის აქციაში მონაწილეობდნენ: „საქართველოს ახალგაზრდა იურისტთა ასოციაციის“ თავმჯდომარე ნონა ქურდოვანიძე; „სამართლიანი არჩევნებისა და დემოკრატიის საერთაშორისო საზოგადოების“ თავმჯდომარე ნინო დოლიძე; „საბჭოთა წარსულის კვლევის ლაბორატორიის“ წარმომადგენელი, გიორგი კანდელაკი; „სამოქალაქო საზოგადოების ფონდის“ წევრი, გიორგი ბურჯანაძე, „საერთაშორისო გამჭვირვალობა - საქართველოს“ წევრი, გიორგი ონიანი და „დემოკრატიის კვლევის ცენტრის” ხელმძღვანელი, უჩა ნანუაშვილი.