ცნობილია ახალგაზრდის ვინაობა, რომელიც ტაშის დაკვრის გამო დააკავეს - ლიაუნის სტუდენტური მოძრაობის ინფორმაციით, რუსთაველის გამზირზე დაკავებულთა შორის ერთ-ერთი ილიას სახელმწიფო უნივერსიტეტის სტუდენტი, ლუკა გოგიაა.

ცნობისთვის, რუსთაველის გამზირზე დაკავებების სერია განახლდა. შინაგან საქმეთა სამინისტროს თანამშრომლებმა უწყვეტი პროტესტის მონაწილე სტუდენტები დააკავა. პოლიციამ ხელბორკილები სამ ახალგაზრდას, მათ შორის, საქართველოს ეროვნული უნივერსიტეტის სტუდენტებს დაადო. 

რუსთაველის გამზირზე დაპატიმრებულთა შორის არიან თაკო გვილია და თათია აფრიამაშვილი. მათთან ერთად ასევე დააკავეს აქციის კიდევ ერთი მონაწილე ახალგაზრდა კაცი, რომელმაც გოგონების დაკავების შემდეგ პოლიციას ტაში დაუკრა. 

პარლამენტთან დაკავებების სერია მას შემდეგ დაიწყო, რაც ძლიერ წვიმაში მყოფი ახალგაზრდებისთვის მოქალაქეებმა პლასტიკის სკამები მიიტანეს. ვახო გომელაურის უწყების წარმომადგენლებმა სტუდენტებს სკამები წაართვეს, შემდეგ კი ძალის გამოყენებით დაკავების მანქანაში ჩატენეს. ახალგაზრდებთან ერთად "დაპატიმრებულია" სკამებიც.