ბრიტანული დრონები რუსეთის სიღრმეში - უკრაინა რუსეთის ტერიტორიაზე შორ მანძილზე დარტყმებისთვის ბრიტანული წარმოების უპილოტო საფრენი აპარატების გამოყენებას აფართოებს. The Times-ის ინფორმაციით, ბოლო ექვსი თვის განმავლობაში ბრიტანული დრონები გამოყენებული იყო რუსეთის სტრატეგიულ ობიექტებზე იერიშებისას, მათ შორის ვოლგოგრადისა და იაროსლავლის ნავთობგადამამუშავებელ ქარხნებზე. სამიზნეებს შორის მოხვდა სამხედრო და ლოგისტიკური ინფრასტრუქტურაც. ერთ-ერთი გამოყენებული აპარატია BAE Systems-ის რეაქტიული „Nyan“, მეორე ბრიტანული დრონის მწარმოებელი კი უსაფრთხოების მიზნით არ სახელდება.

რუსეთის წინააღმდეგ საჰაერო იერიშების მასშტაბი ბოლო დღეებში მკვეთრად გაიზარდა. გასული ღამის შეტევა ომის დაწყებიდან ერთ-ერთი ყველაზე მასშტაბური იყო - რუსეთის თავდაცვის სამინისტრო ამტკიცებს, რომ 822 უკრაინული დრონი ჩამოაგდო, მათგან დაახლოებით 600 მოსკოვისკენ იყო მიმართული. იერიშების სამიზნეებს შორისაა რუსეთის ენერგეტიკული და ლოგისტიკური ინფრასტრუქტურა.

ბრიტანული უპილოტო სისტემების გამოყენება კიევის შორ მანძილზე დარტყმების შესაძლებლობებს მნიშვნელოვნად ზრდის. The Times-ის ცნობით, მსგავსი დრონების მოქმედების რადიუსი 1 000 მილს - დაახლოებით 1 600 კილომეტრს აჭარბებს და ისინი ძვირადღირებული შორ მანძილზე მოქმედი რაკეტების შედარებით იაფ ალტერნატივად განიხილება.

ამ ფონზე კვლავ აქტუალურია კითხვა - რამდენ ხანს აპირებს კრემლი ომის გაგრძელებას. დასავლურ მედიაში გავრცელებული ცნობებით, რუსეთის სამხედრო ხელმძღვანელობა ვლადიმერ პუტინს არწმუნებს, რომ დონბასის სრულად დაკავება სამხედრო გზით შესაძლებელია. დასავლელი ანალიტიკოსები და ოფიციალური პირები კი რუსეთის მიერ დასახული ვადებისა და სამხედრო შესაძლებლობების მიმართ სკეპტიკურად არიან განწყობილი. მათი შეფასებით, თუ მოსკოვი ბრძოლის ველზე დასახულ მიზანს ვერ მიაღწევს, კრემლისთვის რეალურ მოლაპარაკებებზე გადასვლის სტიმული შეიძლება გაიზარდოს.