"შეიარაღებულ კონფლიქტში უკრაინის მხარეს დაქირავებულ მებრძოლად" მონაწილეობის ბრალდებით, მოსკოვის საქალაქო სასამართლომ აშშ-ს 72 წლის მოქალაქეს, სტივენ ჰაბარდს 6 წლითა და 10 თვით პატიმრობა მიუსაჯა. 

რუსული მედიის ცნობით, ჰაბარდმა "რუსეთის წინააღმდეგ ფულადი კომპენსაციის სანაცვლოდ ბრძოლის" ბრალდება აღიარა.

პროკურატურა ჰაბარდისთვის თავისუფლების 7 წლით აღკვეთას ითხოვდა.

სტივენ ჰაბარდი მიჩიგანის შტატშია დაბადებული და აშშ-ს მოქალაქეა. ის უკრაინაში საცხოვრებლად 2014 წელს გადავიდა და ქალთან ერთად ცხოვრობდა.

Reuters-თან ინტერვიუში, სტივენ ჰაბარდის დამ, ტრიშა ჰაბარდმა აღნიშნა, რომ მის ძმას პრორუსული შეხედულებები ჰქონდა და მის აღიარებაში ეჭვი ეპარება.