სასამართლოში არიან მოთამაშეები, რომლებიც დავუშვათ ირაკლი ღარიბაშვილს ან სხვა პირებს უჭერდნენ მხარს - ამის შესახებ "პირველებთან" უზენაესი სასამართლოს ყოფილი მოსამართლე, თამარ ლალიაშვილი საუბრობს.

ლალიაშვილის თქმით, სწორედ ამიტომ "სასამართლო კლანი" უკვე თავის თანამოაზრეებს რეალურად აღარ ენდობა.

ყოფილი მოსამართლე ამბობს, რომ მურუსიძის გავლენიანმა ჯგუფმა საფრთხე იგრძნო და სწორედ ამიტომ გადავიდა იუსტიციის უმაღლესი საბჭოს ხელში ის უფლებები, რაც  მათ საშულებას მისცემს, მოსამართლეს უკვე განაწილებული საქმე ჩამოართვას და სხვა მოსამართლეს გადასცეს.

ვფიქრობ, რაღაც ძვრები ალბათ არის იმაში, რომ მოსამართლეები და განსაკუთრებით კლანი უკვე თავის თანამოაზრეებს რეალურად აღარ ენდობა, იქიდან გამომდინარე, რომ ჩვენ ვხედავთ თვითონ "ოცნებაში" ამ დაყოფას და მათ ნგრევას, თუნდაც იგივე ღარიბაშვილის საქმესთან მიმართებაში. არიან მოთამაშეები, იგივე სასამართლოში, რომლებიც დავუშვათ იმ ღარიბაშვილს უჭერდნენ მხარს ან სხვა პირს უჭერდნენ მხარს ან მათი მეგობრები არიან და ეს ალბათ, გარკვეულ საფრთხეებს წარმოადგენს მათთვის. აქედან გამომდინარე, კიდევ ერთი ნაბიჯი გადადგა თავიანთი ძალაუფლების კონსოლიდაციისთვის, საბჭოს ხელში გადავიდა მთლიანად, რასაც უნდა იმას გააკეთებენ. კიდევ აღვნიშნავ, რომ არც მაშინ იყო ამის ნაკლებობა. რაც უნდოდათ მაინც აკეთებდნენ იმას, მაგრამ ალბათ საფრთხეები დაინახეს და ეს განახორციელეს", - ამბობს თამარ ლალიაშვილი. 

სანქცირებული ლევან მურუსიძის თავმჯდომარეობით იუსტიციის საბჭოს ახალი უფლებები ენიჭება. ცვლილებების მიხედვით, საბჭოს მკვეთრად უძლიერდება შესაძლებლობა, ელექტრონული განაწილების პროცესის მიღმა გადაწყვიტოს, რომელმა მოსამართლემ უნდა განიხილოს კონკრეტული საქმე.

კანონში შესული ცვლილებები საშუალებას აძლევს იუსტიციის საბჭოს, მოსამართლეს უკვე განაწილებული საქმე ჩამოართვას და სხვა მოსამართლეს გადასცეს.