მიხეილ ყაველაშვილი ჯეი დი ვენსსა და მარკო რუბიოსთან გასაუბრების შესახებ პირველ კომენტარს აკეთებს - "ოცნების" მიერ არჩეული პრეზიდენტის თქმით, ამერიკის ვიცე-პრეზიდენტთან და სახელმწიფო მდივანთან "ძალიან თბილი შეხვედრა" ჰქონდა.

ვიმედოვნებთ, რომ ჩვენი ურთიერთობები მომდევნო წლებში გაგრძელდება დინამიკურად, როგორც ამ თბილი შეხვედრის შემდეგ დარჩა შთაბეჭდილებები - განაცხადა ყაველაშვილმა. 

„პირველი დღე, როცა საერთაშორისო ოლიმპიური კომიტეტის მიღებას დავესწარით, აღვნიშნე კიდევაც, რომ ბევრი ქვეყნის ლიდერი ესწრებოდა. სწორედ ამისთვის იყო ეს ვახშამი ორგანიზებული, რომ ჩვენ გვქონოდა ერთმანეთთან გასაუბრების საშუალება და ამ ფორმატში, გვქონდა შესაძლებლობა, რომ გავსაუბრებოდით ამერიკის ვიცე-პრეზიდენტს ჯეი დი ვანსს და სახელმწიფო მდივანს მარკო რუბიოს. ძალიან თბილი შეხვედრა [იყო]. იცით, რომ არსებული ადმინისტრაცია იმ ღირებულებით ნაწილში, რომელსაც ჩვენ უკვე წლებია ვადგავართ, ეროვნულ ინტერესზე, ოჯახურ ღირებულებებზე... სხვათა შორის, აღნიშნა ქრისტიანული, ისტორიული საკითხები - ჩვენი ქვეყნის ასეთი დამოკიდებულება იცოდა ვიცე-პრეზიდენტმა და საკმაოდ კარგი სიტყვები არ დაიშურა. ჩვენი პატრიარქიც ახსენა, სხვათა შორის და ასეთი თბილი, კარგი ურთიერთობა გვქონდა. ხაზი გაესვა ჩვენს საერთო ღირებულებებს და ვიმედოვნებთ, რომ ჩვენი ურთიერთობები მომდევნო წლებში გაგრძელდება დინამიკურად, როგორც ამ თბილი შეხვედრის შემდეგ დარჩა შთაბეჭდილებები ერთმანეთის მიმართ”, -განაცხადა ყაველაშვილმა.