როგორ გახსნა გერმანიის მიერ დაფინანსებულმა უნივერსიტეტმა საქართველოში ნაცისტური გავლენის მქონე კვლევითი ცენტრი - ამ სათაურით სტატიას OC media ავრცელებს. 

გამოცემა წერს, რომ ქუთაისის საერთაშორისო უნივერსიტეტმა (KIU) 2026 წლის თებერვლის დასაწყისში "ასტრომეცნიერებებისა" და "ასტროარქეოლოგიის" კურსების (აღნიშნული დისციპლინები ფართოდ არის აღიარებული, როგორც ფსევდომეცნიერული) შეთავაზება დაიწყო, რასაც სწრაფადვე მოჰყვა უარყოფითი რეაქცია და პროგრამები მალევე ამოიღეს საქართველოს ეროვნული სასწავლო გეგმიდან, თუმცა პროგრამების უკან მდგომი ცენტრი, უნივერსიტეტის იბერიული კულტურული მემკვიდრეობის კვლევითი ცენტრი, ფუნქციონირებას კვლავ აგრძელებს. OC media-ს ინფორმაციით, აღნიშნული ცენტრი იბერიული გემატრიის სპეციალისტმა ალეკო (ალიკო) ცინცაძემ რამდენიმე თვით ადრე დააარსა. ცენტრი აცხადებს, რომ ის KIU-ს ნაწილად ფუნქციონირებს და საქართველოს მთავრობის მიერ ფინანსდება. 

•  OC media წერს რომ Ganatleba-ს სტატიის თანახმად, რომელიც საქართველოს განათლების სექტორზეა ორიენტირებული, გემატრია არის ნუმეროლოგიური სისტემა, რომელიც ასოებსა და სიტყვებს ანიჭებს რიცხვით მნიშვნელობას წმინდა ტექსტებში დაფარული ან ეზოთერული ცოდნის გამოსავლენად.

უნივერსიტეტის იბერიული კულტურული მემკვიდრეობის კვლევითი ცენტრის გახსნა 2025 წლის სექტემბერში ფართოდ გაშუქდა პროსამთავრობო მედია საშუალებების მიერ. ღონისძიებაზე უნივერსიტეტის იმდროინდელმა რექტორმა პაატა ტურავამ ცენტრი "ჰუმანიტარულ მეცნიერებებში ინტერდისციპლინარული მიდგომების" დანერგვისთვის მნიშვნელოვან ცენტრად შეაფასა. ტურავამ გამოსვლა დაასრულა სიტყვებით, "ჩვენ მხოლოდ იმით უნდა ვიამაყოთ, რომ ამ დიდი მეცნიერის, პროფესორ ალიკო ცინცაძის თანამედროვეები ვართ".- წერს მედია. 

როგორც OC media წერს, ალიკო ცინცაძის განცხადებით, მისი კვლევა მესამე რაიხის დროინდელი გერმანული აკადემიური წრეებიდან იღებს წყაროებს. ინტერვიუში მან ჰაინრიხ ჰიმლერის SS-ის დანაყოფის „აჰნებერბეს“ მიერ შექმნილი ნაშრომების გამოყენება მოიხსენია, რომელიც ნაცისტური გერმანიის რასობრივი იდეოლოგიის ცენტრალურ ნაწილად ითვლება.

და ახლა ამას [აჰნებერბეს ნაშრომს] ძალიან მოხერხებულად ვიყენებ: თუ რაიმე მნიშვნელოვანის გამოსწორება გვჭირდება, მას გერმანელი მეცნიერების ნაშრომებში ვეძებ, რადგან გერმანელები [ამ კვლევაში] ნამდვილად აჭარბებენ ქართველებს, რადგან მათ ეს ჰიტლერის პერიოდში შეკვეთით შეისწავლეს და მოგვიანებით ინერციით გააგრძელეს. ამიტომ, ამ ყველაფერს ძალიან სერიოზული მნიშვნელობა აქვს," - თქვა ცინცაძემ.

OC media, წერს, რომ ალიკო ცინცაძემ ინტერვიუში აღიარა, რომ კვლევის ნაწილი მას ნახევრად მძინარე მდგომარეობაში ჩაუვარდა თავში და ამავდროულად, თავი XI საუკუნის ქართველ მონარქ დავით აღმაშენებელთან გააიგივა. 

[ამან] ნდობის საკითხი წარმოშვა, რამაც შესაძლოა ძალიან ნეგატიური შედეგები მოიტანა როგორც საერთაშორისო თანამშრომლობისთვის, ასევე ადგილობრივი სტუდენტების მოზიდვისთვის," - განუცხადა OC Media-ს პროგრამების შესახებ საქართველოს Erasmus+ ეროვნული ოფისის ყოფილმა ხელმძღვანელმა, ლიკა ღლონტმა.

მან დასძინა, რომ KIU-მ უნივერსიტეტის შესაძლებლობების მხოლოდ ნახევრის ჩარიცხვა მოახერხა და რომ "ბოლო მოვლენები ადგილობრივ პოტენციურ სტუდენტებს მოტივაციას არ მისცემს".

•  KIU 2020 წელს დააარსა „ქართული ოცნების“ დამფუძნებელმა ბიძინა ივანიშვილმა და მისმა „ქართუ ჯგუფმა“, რამდენიმეწლიანი მოსამზადებელი სამუშაოების შემდეგ, რომლის დროსაც გამოცემის ინფორმაციით, ,გერმანიის მიუნხენის ტექნიკური უნივერსიტეტის (TUM) სპეციალისტები მინიმუმ 2017 წლიდან იყვნენ ჩართულნი.

OC media-ს ინფრომაციით, სტრატეგიული პარტნიორობა, სადაც TUM აღმასრულებელ ორგანოებში რამდენიმე მნიშვნელოვან თანამდებობას იკავებს, კვლავ გრძელდება მიუხედავად იმისა, რომ სხვა ევროპულმა უნივერსიტეტებმა, მათ შორის გერმანიიდან, შეშფოთება გამოთქვეს უმაღლესი განათლების სფეროში საქართველოს მთავრობის მიერ განხორციელებული ფართომასშტაბიანი ცვლილებების გამო, რეფორმები, რომლებიც ფართოდ განიხილება, როგორც აკადემიურ თავისუფლებაზე შეტევა.

• 2019 წელს, KIU-ს შექმნამდე, საქართველომ მიიღო კონკრეტული კანონმდებლობა, რომლითაც იგი გაათავისუფლა რეგულარული ზედამხედველობის მექანიზმებისგან და მის მმართველობას სპეციალური სამართლებრივი ჩარჩოთი არეგულირებდა.

ქუთაისის საერთაშორისო უნივერსიტეტი ერთადერთი უმაღლესი საგანმანათლებლო დაწესებულებაა საქართველოში, რომელიც არ გადის ინსტიტუციური ავტორიზაციის პროცესს და რომლის სასწავლო პროგრამებიც არ ექვემდებარება პროგრამულ აკრედიტაციას," - განმარტა OC media-თან ღლონტმა.

ღლონტის თქმით, განსაკუთრებული სტატუსის ახსნა იმაშია, რომ უნივერსიტეტი ივანიშვილის პირადი პროექტების ნაწილია - "[ივანიშვილი] თავისუფლად გრძნობს თავს, გააკეთოს ის, რაც სურს "საკუთარ" უნივერსიტეტში, აღმასრულებელ ორგანოებთან და/ან საერთაშორისო პარტნიორებთან კონსულტაციის გარეშეც კი".

KIU-ს საერთაშორისო საკონსულტაციო საბჭოს თავმჯდომარის ვოლფგანგ ჰერმანის განცხადებით, არც იბერიული ცენტრის დაარსება და არც ასტრომეცნიერებასთან დაკავშირებული პროგრამების დანერგვა არ წარუდგენიათ საერთაშორისო საკონსულტაციო საბჭოსთვის.

კვლევითი ცენტრი არ არის საკონსულტაციო საბჭოს საქმე, მიუხედავად ამისა, ის ჩვენგან დამოუკიდებლად შეიქმნა. ახლა ჩვენ უფრო დეტალურად განვიხილავთ ამ ე.წ. ინსტიტუტის შინაარსს," - თქვა ჰერმანმა OC media-სთან და დასძინა, რომ მას ცინცაძის შესახებ არასდროს სმენია.

"[ცენტრი] ჩემი ცოდნის გარეშე დაარსდა" - აღნიშნა ჰერმანმა.

გულწრფელად რომ ვთქვა, ასტროლინგვისტიკის შესახებ მეტი უნდა ვისწავლო, რადგან ცხოვრებაში არასდროს მსმენია ამის შესახებ... სანამ გადაწყვეტილებას მივიღებთ, ამ თეორიას ძალიან მალე უფრო დეტალურად განვიხილავთ, თუმცა არ მგონია, რომ ჰიტლერის რეჟიმიდან იყოს შთაგონებული. თუმცა, მოდით, [სანამ გადაწყვეტილებას მივიღებთ], მთლიან საკითხს გადავხედოთ," - განაცხადა მან OC media-სთან.

[ფოტო: OC media]