ირანის სპეცსამსახურების სასარგებლოდ ჯაშუშობის ბრალდებით საბერძნეთში დაკავებული საქართველოს მოქალაქე, 35 წლის სამირ გ. გარდაბნის მუნიციპალიტეტის მკვიდრია - ინფორმაციას ამის შესახებ  „სტუდია მონიტორი“ ავრცელებს. 

გამოცემა წერს, რომ ბრალდებული მარნეულის ერთ-ერთ შიიტურ მედრესეში სწავლობდა.  მოგვიანებით, ორი წლის განმავლობაში, რელიგიური განათლება ირანის ქალაქ ყუმში გაიღრმავა. 

ჟურნალისტებმა გაარკვიეს, რომ რამდენიმე წლის წინ, 35 წლის სამირ გ-ს ირანის მოქალაქესთან ერთად  საქართველოში ბიზნესიც ჰქონდა - გარდაბანსა და თბილისში ირანიდან შემოტანილ მარილს ყიდდა.

"მან ოჯახთან ერთად ევროპაში თავშესაფრის მოთხოვნაც მოასწრო, მაგრამ ბელგიაში დამკვიდრების მცდელობა, ოთხსულიანი ოჯახის დეპორტაციით დასრულდა“, - წერს „სტუდია მონიტორი“.

გამომძიებელი ჟურნალისტების სტუდია სამირ გ.-ს დედას ესაუბრა. ქალი ამბობს, რომ მისი ვაჟი „ჯაშუში არ არის“.