ყოფილი გენერალური პროკურორის, მაია მწარიაშვილის განცხადებით, პოლიციის მხრიდან ძალადობის ამსახველი კადრები, მათ შორის ჟურნალისტებზე და დაკავებულ მოქალაქეებზე ფიზიკური ანგარიშსწორების ეპიზოდები, სამართლებრივად წამებისა და არაადამიანური მოპყრობის ნიშნებს შეიცავს. მისი თქმით, სახელმწიფო ბრალდება მსგავს ფაქტებს განზრახ არ აკვალიფიცირებს შესაბამისი მუხლებით და მათ სამოხელეო დანაშაულის კატეგორიაში ტოვებს, რათა სისტემაში „მწამებელი პოლიციელებისა“ და წამების შემთხვევების არსებობა ოფიციალურად არ დაფიქსირდეს.

ყველა ის კადრი, რომელიც პირდაპირ ეთერში ვნახეთ, როდესაც პოლიციელი ჟურნალისტებზე, როგავას ეპიზოდი მაქვს მხედველობაში, და წიხლებს თავში რომ ურტყამენ იმ ახალგაზრდასთან დაკავშირებით, ყველა ასეთივე კადრი, სადაც პოლიცია ძალადობს, სამართლებრივად არის წამება, არაადამიანური მოპყრობის კვალიფიკაცია, სისასტიკის ხარისხის და იმის მიხედვით მიზანი რა აქვს, შეიძლება მოხდეს დიფერენციაცია მხოლოდ არაადამიანურ და წამების კვალიფიკაციას შორის. რატომ არ აკვალიფიცირებს სახელმწიფო ბრალდება არცერთ ამ ტიპის საპოლიციო ძალადობას, სისტემური რომაა, ეს ცხადია, მაგრამ ამ წუთას ამაზე არ ვსაუბრობთ. რატომ არ აკვალიფიცირებს იმ მუხლით, რომლითაც უნდა დააკვალიფიციროს? რატომ წამების და არაადამიანური მოპყრობით და რატომ სამოხელეო დანაშაულით? სწორედ იმიტომ, რომ ესს არის მწამებელი პოლიციელების და მოძალადე სისტემის სამართლებრივი გადარჩენის სპეცოპერაციაა, რასაც სახელმწიფო ბრალდება აკეთებს ყველა ასეთ შემთხვევაში. ანუ მათ ქმედებას არ არქმევს იმ სახელს, რაც ჰქვია, შესაბამისად, ჩვენ სისტემაში არ გვყავს მწამებელი პოლიციელები, არ გვაქვს წამების ეპიზოდები, რომ არ ვილაპარაკოთ შემდეგ წამების სიტემატიურობაზე და არცერთ საერთაშორისო მოხსენებაში არ გამოჩნდება წამების ეპიზოდები და გვეტყვიან, რომ ეს არის ერთეული ინციდენტები, - ამბობს მწარიაშვილი.

TV პირველის „შაბათის ეთერის“ ინფორმაციით, ჟურნალისტებმა მოიპოვეს ვიდეომასალები, რომლებშიც, სავარაუდოდ, პოლიციის განყოფილებებში მოქალაქეების მიმართ ძალადობისა და არაადამიანური მოპყრობის ფაქტებია ასახული. რეპორტაჟის თანახმად, კადრები თავად სამართალდამცველების მიერ იყო გადაღებული და შიდა ჩატებში ვრცელდებოდა. ამ ეტაპზე მოპოვებულია ხუთი ვიდეო, სადაც მინიმუმ სამი სავარაუდო დაზარალებული ფიგურირებს.

მასალები გამომძიებელ ჟურნალისტებს გიორგი კვიცარაძის ოჯახმა გადასცა. ოჯახის მტკიცებით, კვიცარიძემ პოლიციელების შიდა მიმოწერების ჩატიდან ათეულობით ვიდეოფაილი ჩამოტვირთა, რის შემდეგაც დააკავეს. დედა შვილის დაკავების მიზეზად სწორედ აღნიშნული მასალების გავრცელებას ასახელებს. ერთ-ერთ ვიდეოში, გავრცელებული ინფორმაციით, ჩანს ფიზიკური ძალადობისა და იძულების ფაქტი. ასევე შესაძლებელია სავარაუდო მონაწილე პოლიციელების ამოცნობა ხმებითა და გამოსახულებით.