"ელენე ხოშტარია და საქართველოს რეჟიმის ყველა სხვა პოლიტიკური პატიმარი დაუყოვნებლივ უნდა გათავისუფლდნენ" - ამის შესახებ ევროსაბჭოს საპარლამენტო ასამბლეის დეპუტატმა, ერიკ კროსმა მიმდინარე დებატებზე განაცხადა.

მისი თქმით, პოლიტიკური პატიმრების გათავისუფლება უნდა იყოს წინაპირობა ნებისმიერი დიალოგისთვის, თანამშრომლობისთვის და საქართველოს ნებისმიერი ევროპული ჩართულობისთვის. 

ელენე ხოშტარია და საქართველოს რეჟიმის ყველა სხვა პოლიტიკური პატიმარი დაუყოვნებლივ უნდა გათავისუფლდნენ. მათი გათავისუფლება უნდა იყოს წინაპირობა ნებისმიერი დიალოგისთვის, ნებისმიერი თანამშრომლობისთვის და საქართველოსთვის ნებისმიერი ევროპული ჩართულობისთვის.

მაგრამ დღეს ჩვენ საქართველოში დემოკრატიული ინსტიტუტების ფუნქციონებას განვიხილავთ და, გულწრფელად რომ ვთქვათ, სათაური უნდა იყოს დემოკრატიული ინსტიტუტების არაფუნქციონირება რადგან რეალურად სწორედ ასეთ მდგომარეობასთან გვაქვს საქმე.

რას ვითხოვდით და ვიმეორებდით?გაუქმდეს უცხოური გავლენის შესახებ კანონი, გაიწვიონ აგენტების კანონი, გაუქმდეს ე.წ. ოჯახური ღირებულებების კანონი, რეფორმირდეს ადმინისტრაციულ სამართალდარღვევათა კოდექსი, შეწყდეს პოლიციის მიერ ძალადობა და წამება, გათავისუფლდნენ პოლიტიკური პატიმრები, დასრულდეს საპროტესტო აქციების მონაწილეთა წინააღმდეგ შურისძიების მოტივით დაწყებული საქმეები. აღდგეს პირობები ახალი, ნამდვილი დემოკრატიული საპარლამენტო არჩევნებისთვის, არ აიკრძალოს ოპოზიციური პარტიები.

არც ერთი ეს მოთხოვნა არ შესრულებულა. მდგომარეობა კიდევ უფრო გაუარესდა.

ამიტომ ჩემი დღევანდელი გზავნილი მხოლოდ საქართველოს არ ეხება. ის ევროსაბჭოსაც ეხება.

საქართველო უარს ამბობს ასამბლეაში თავისი დელეგაცია გამოგზავნოს, ის ცდილობს ამ ასამბლეის შანტაჟს და ჩვენ ამის საშუალებას ვაძლევთ," - განაცხადა ერიკ კროსმა. 

ცნობისთვის, დღეს, ასამბლეის საზაფხულო სესიის სხდომაზე საქართველოს შესახებ დებატები მიმდინარეობს, კენჭი ეყრება რეზოლუციის პროექტს, რომელიც ქვეყნის დემოკრატიულ მდგომარეობას აფასებს.