ირაკლი ღარიბაშვილისთვის ჯარის შესყიდვებთან დაკავშირებულ საქმეზე ახალი კორუფციული ბრალის წარდგენას ენმ-ს წევრი, ლაშა ფარულავა ეხმაურება და პასუხისმგებლობას ბიძინა ივანიშვილსა და „ქართულ ოცნებას“ აკისრებს.

მისი თქმით, ელიტური კორუფცია არც ღარიბაშვილისგან და არც ბურჭულაძისგან წამოსულა და ეს მთლიანად ივანიშვილის და "ოცნების" პასუხისმგებლობაა. 

ჩვენი წლების განმავლობაში ვსაუბრობდით ქართული არმიის, ქართული ჯარის, ჩვენი სამხედროების ძარცვაზე, ძარცვაზე, რომელიც მოდის არა ღარიბაშვილისგან, არა ბურჭულაძისგან, არამედ ბიძინა ივანიშვილისგან. ქართული არმიის ძარცვაზე, ამ ელიტურ კორუფციაზე პასუხისმგებელი არის ბიძინა ივანიშვილი და "ქართული ოცნება", - ამბობს ფარულავა. 

ირაკლი ღარიბაშვილს ახალი კორუფციული ბრალი წარუდგინეს - საქმე ჯარის ძარცვის საქმეზე დიდი ოდენობით ქრთამის აღებას ეხება. ამის შესახებ გენერალური პროკურორის მოადგილემ ამირან გულუაშვილმა უწყებაში გამართულ ბრიფინგზე განაცხადა. 

ირკვევა, რომ გამოძიებასთან თავდაცვის ყოფილმა მინისტრმა, ჯუანშერ ბურჭულაძემ და მისმა ნათესავმა, მსჯავრდებულმა ვასილ მხეიძემ ითანამშრომლეს.

პროკურატურის ინფომრაციით, ჯარის ძარცვიდან მიღებულ ქრთამს ჯუანშერ ბურჭულაძე ყოფილ პრემიერთან იყოფდა. საუბარია 1 500 000 ლარზე, რომლის ნახევარი ქრთამის სახით თავად დაიტოვა ბურჭულაძემ, ნახევარი კი ირაკლი ღარიბაშვილს რამდენიმე ეტაპად ასევე ქრთამის სახით ხელზე გადასცა.

• გამოძიებით დადგინდა, რომ შესყიდვებში მონაწილე ბიზნესმენმა რამდენიმე ეტაპად ვასილ მხეიძეს ნაღდი ფულის სახით გადასცა მთლიანი სახელშეკრულებო ღირებულებების დაახლოებით 10% - 1 900 000 ლარი, საიდანაც ამ უკანასკნელმა პირადი სარგებლის სახით დაიტოვა 400 000 ლარი, ხოლო დარჩენილი თანხა სრულად გადასცა ჯუანშერ ბურჭულაძეს. ამ უკანასკნელმა ქრთამის სახით მიღებული 1 500 000 ლარიდან, 750 000 ლარი დაიტოვა თავად, ხოლო თანხის მეორე ნახევარი - 750 000 ლარი რამდენიმე ეტაპად ასევე ქრთამის სახით ხელზე გადასცა ირაკლი ღარიბაშვილს.

ახალი კორიფციული ბრალი, რომელიც ღარიბაშვილს წარედგინა 11-15 წლამდე პატიმრობას ითვალისწინებს.