მმართველი პარტიის ერთ-ერთი წარმომადგენელი, ირაკლი ზარქუა, სახალხო დამცველის პოსტზე მხარს იაგო ხვიჩიას დაუჭერს -  ეს განცდა რჩება ინტერვიუთი, რომელიც საპარლამენტო უმრავლესობის წევრმა ჟურნალისტებს საკანონმდებლო ორგანოში მისცა.

სახალხო დამცველის შერჩევის პროცესი ღია და გამჭვირვალეა. ჩემი ერთ-ერთი ფავორიტი იაგო ხვიჩიაა. არ გამოვრიცხავ, მას მხარი დავუჭირო. კოლეგაა და კომიტეტშია,  კვალიფიციური იურისტია და მგონია, გაცილებით უკეთესი სახალხო დამცველი იქნება, ვიდრე ახლა გვყავს - განაცხადა ირაკლი ზარქუამ.

,,გირჩის" ერთ-ერთი ლიდერი, იაგო ხვიჩია, აპირებს, ხვალ სახალხო დამცველის პოსტზე საკუთარი განაცხადი ხვალ ოფიციალურად დაარეგისტრიროს. 

პოლიტიკურად მიუკერძოებელი, პროფესიონალი და კომპეტენტური - ეს ის თვისებებია, რაც სახალხო დამცველს უნდა გააჩნდეს. აღნიშნულ კრიტერიუმზე ოპოზიციაც და ხელისუფლებაც თანხმდება. 

გიორგი ბურჯანაძე, ანა აბაშიძე,  ნაზი ჯანეზაშვილი - არასამთავრობო სექტორმა დღეს სახალხო დამცველის პოსტზე საკუთარი კანდიდატურა წარმოადგინა.