სამსახურებრივი მდგომარეობის გამოყენებით, დიდი ოდენობით თანხის მითვისებისა და სამსახურებრივი უფლებამოსილების ბოროტად გამოყენების ფაქტზე, შპს „ქედის ავტოსატრანსპორტო საწარმოს“ ყოფილი დირექტორი, გიორგი ბარამიძის დააკავეს.

მთავარი პროკურატრის ინფორმაციით, გამოძიებით დადგინდა, რომ შპს ,,ქედის ავტოსატრანსპორტო საწარმოსა“ და ქედის მუნიციპალიტეტის მერიას შორის ყოველწლიურად ფორმდებოდა სუბსიდირების ხელშეკრულებები შესაბამისი ბიუჯეტით, ამბულატორიული მომსახურების პროგრამასთან დაკავშირებით.

საქმის მასალების თანახმად, „ქედის ავტოსატრანსპორტო საწარმოს“ დირექტორმა, ბოროტად გამოიყენა სამსახურებრივი უფლებამოსილება საჯარო ინტერესის საწინააღმდეგოდ და ამბულატორიული მომსახურების პროგრამით გათვალისწინებული თანხები უკანონოდ გადარიცხა თავის საბანკო ანგარიშზე, რითაც მართლსაწინააღმდეგოდ მიითვისა 97 933 ლარი და სახელმწიფო ბიუჯეტს დიდი ოდენობით ზიანი მიაყენა.

იგი დაკავებულია საქართველოს სისხლის სამართლის კოდექსის 182-ე მუხლის მე-2 ნაწილის „ა“, „დ“ და მე-3 ნაწილის „ბ“ ქვეპუნქტებით (სამსახურებრივი მდგომარეობის გამოყენებით, დიდი ოდენობით  თანხების ჯგუფურად მითვისება) და 332-ე მუხლის პირველი ნაწილით (სამსახურებრივი უფლებამოსილების ბოროტად გამოყენება), რაც სასჯელის სახედ და ზომად 7-დან 11 წლამდე თავისუფლების აღკვეთას ითვალისწინებს.

პროკურატურა ბრალდებულისთვის აღკვეთის ღონისძიების შეფარდების შუამდგომლობით, სასამართლოს კანონით დადგენილ ვადაში მიმართავს"- წერია პროკურატურის განცხადებაში. 

გამოძიება გრძელდება დანაშაულებრივ ქმედებაში ჩართული სხვა პირების დადგენის მიზნით.

ცნობისთვის, აჭარის მთავარი პროკურატურა გიორგი ბარამიძის საქმიანობით მას შემდეგ დაინტერესდა, რაც "ტვ პირველმა" მისი აღიარებითი "ჩვენება" გაავრცელა.  ინტერვიუში  საჯარო მოხელე ადასტურებდა, რომ საბიუჯეტო სახსრებიდან ხელფასს თვეში რამდენიმეჯერმე  ირიცხავდა. 

გიორგი ბარამიძე ქედის საკრებულოს თავმჯდომარის სიძეა.