პრემიერის სკანდალური რეისი  - სახელმწიფო დაცვის სპეციალური სამსახურის ხელმძღვანელი გამოჩნდა. რამდენიმე წუთის წინ, ანზორ ჩუბინიძემ მედიას უთხრა, რომ თბილისი-მიუნხენი-თბილისის ჩარტერულ რეისში ფული ღარიბაშვილს მამამ, ტარიელ ღარიბაშვილმა გადაუხადა. 

თუ ჩუბინიძეს დავუჯერებთ, ტარიელ ღარიბაშვილმა ამ ყველაფერში 34 ათასი ევრო გადაიხადა. 

სახელმწიფო დაცვის სპეციალური სამსახურში ამტკიცებენ, რომ თანხა წინსწრებით იყო გადახდილი და დავალების მიცემის მომენტში, მითითებული იყო, რომ ანგარიშსწორება მოხდებოდა არასაბიუჯეტო სახსრებიდან.

ჩუბინიძემ თქვა ისიც, რომ ხარჯთაღრიცხვას  „ჯორჯიან ეარვეისი“ გამოაქვეყნებს. 

მინდა, საზოგადოებას დავუდასტურო, რომ სახელმწიფო დაცვის სპეციალური სამსახურის საჯარო სამართლის იურიდიული პირის უზრუნველყოფის სააგენტოს ანგარიშზე გაკეთებულია შენატანი, რომელიც უზრუნველყოფს თბილისი-მიუნხენი-თბილისის რეისთან დაკავშირებულ ხარჯებს. შენატანი გაკეთებულია კერძო პიროვნების მიერ და ეს თანხა არის 34 ათასი ევროს ექვივალენტი ლარში. თანხა წინსწრებით გადახდილია და შესაბამისად, სავარაუდოა, შესაძლებელია იგი მცირედით დაკორექტირდეს მას შემდეგ, რაც ავიაკომპანია „ჯორჯიან ეარვეისი“ წარმოგვიდგენს დეტალურ ხარჯთაღრიცხვას. წარმოდგენისთვის სჭირდება ხოლმე დაახლოებით რეისის შესრულებიდან თვე-ნახევარი. წარმოდგენისთანავე ჩვენ მივახდენთ ანგარიშსწორებას. გადახდილი თანხა სრულად უზრუნველყოფს მიმდინარე ხარჯს და არის გარკვეული ფასნამატიც.

რაც შეეხება საბიუჯეტო გადასახადებს, საზოგადოებას მინდა, დავუდასტურო, რომ საწყის ეტაპზე, დავალების მიცემის მომენტში, ნათლად იყო მითითებული, რომ ანგარიშსწორება მოხდებოდა არასაბიუჯეტო სასხსრებიდან. საზოგადოებას დღეს ვუდასტურებ, რომ ანგარიშსწორება განხორციელდა კერძო პიროვნების მიერ და ეს პიროვნება ტარიელ ღარიბაშვილია“, – განაცხადა ანზორ ჩუბინიძემ.