"საქართველოს პრეზიდენტად წოდებული სალომე ზურაბიშვილი ყველა წითელ ზღვარს კვეთს და ასეთ დროს რა ნდობაზეა საუბარი? " - ეს განცხადება "ქართული ოცნების" თავმჯდომარემ და იმპიჩმენტის სარჩელის ავტორმა ირაკლი კობახიძემ გააკეთა.

მმართველი პარტიის თავმჯდომარე ამბობს, რომ მთავრობას პრეზიდენტის მიმართ ნდობა აღარ აქვს და სახელისუფლებო გუნდი სალომე ზურაბიშვილს სათანადო პასუხს გასცემს. 

არ არსებობს ნდობა, მთავრობასა და პრეზიდენტს შორის. მთავრობა არ ენდობა პრეზიდენტს. იმიტომ რომ პრეზიდენტი, მაგალითად, 26 მაისს გამოვიდა სამარცხვინოდ და მთავრობის საქმიანობისთვის ბოდიში მოუხადა 2008 წელს დაღუპული გმირების ოჯახის წევრებს. ამის შემდეგ როგორ უნდა ენდოს მთავრობა პრეზიდენტს? ნდობაზეც არაა საუბარი. საქართველოს პრეზიდენტად წოდებული სალომე ზურაბიშვილი ყველა წითელ ზღვარს კვეთს და ასეთ დროს რა ნდობაზეა საუბარი? რა თქმა უნდა, მთავრობას აქვს ნული ნდობა პრეზიდენტის მიმართ, განსაკუთრებით მაშინ, როდესაც საქმე კანდიდატის სტატუსის მიღებას ეხება. ამ ყველაფერზე ისეთ პასუხს გავცემთ, რომ ქვას გახეთქავს," - ამბობს კობახიძე.