კულტურის სამინისტრო კონსერვატორიაში მიმდინარე პროცესებზე მორიგ განცხადებას ავრცელებს. განცხადებაში ნათქვამია, რომ კონსერვატორიამ 2 ოქტომბერს თბილისის საქალაქო სასამართლოს კულტურის სამინისტროს წინააღმდეგ სარჩელით მიმართა, რომელშიც მინისტრის 2023 წლის 25 სექტემბრის ბრძანების ბათილად ცნობას ითხოვდა.

უწყების ცნობით, სასამართლოს გადაწყვეტილებით არ დაკმაყოფილდა კონსერვატორიის შუამდგომლობები, შესაბამისად, მინისტრის 25 სექტემბრის ბრძანება ძალაში რჩება და კონსერვატორიის რექტორის არჩევნები ვერ ჩატარდება იქამდე, სანამ კონსერვატორია სათანადო სამართლებრივ დოკუმენტაციას კანონთან შესაბამისობაში არ მოიყვანს.

2023 წლის 29 სექტემბერს სამინისტროში გაიმართა სამუშაო შეხვედრა კონსერვატორიის აკადემიური საბჭოს წევრებისა და ტრადიციული მრავალხმიანობის კვლევის საერთაშორისო ცენტრის წარმომადგენლების მონაწილეობით. შეხვედრას ხელმძღვანელობდა მინისტრის პირველი მოადგილე იოსებ ბაღათურია. შეხვედრაზე შეთანხმდნენ, რომ სამინისტრო და კონსერვატორია მჭიდროდ ითანამშრომლებდნენ კონსერვატორიის შესაბამისი სამართლებრივი დოკუმენტაციის მოსაწესრიგებლად და იხელმძღვანელებდნენ მხოლოდ კონსერვატორიის საუკეთესო ინტერესებით.

ამავე შეხვედრაზე კონსერვატორიის წარმომადგენლებმა აღნიშნეს, რომ ხუთ სამუშაო დღეში ვერ შეძლებდნენ შესაბამისი სამართლებრივი დოკუმენტების შემუშავებას და მოითხოვეს დამატებითი ვადა, რაზეც შეხვედრაზევე მიიღეს სამინისტროს თანხმობა. მოგვიანებით, მიმოწერისა და კონტაქტების შედეგად, დოკუმენტაციის მოწესრიგების საბოლოო ვადად განისაზღვრა 10 ოქტომბერი, თუმცა როგორც დღეს, 2023 წლის 9 ოქტომბერს, სამინისტროში შემოსული სასამართლო შეტყობინებებით ირკვევა, 2023 წლის 2 ოქტომბერს კონსერვატორიამ თბილისის საქალაქო სასამართლოს მიმართა სამინისტროს წინააღმდეგ სარჩელით, რომელსაც ხელს აწერს რექტორის მოვალეობის შემსრულებელი თამარ ბულია (რექტორი კონსერვატორიისათვის ესოდენ მნიშვნელოვან დროს იმყოფება ხანგრძლივ მივლინებაში).

აღნიშნული სარჩელით კონსერვატორიამ მოითხოვა მინისტრის 2023 წლის 25 სექტემბრის ბრძანების ბათილად ცნობა. ასევე, კონსერვატორიამ სასამართლოს მიმართა შუამდგომლობებით და მოითხოვა სარჩელზე საბოლოო გადაწყვეტილების მიღებამდე მინისტრის ბრძანების მოქმედების შეჩერება და სამინისტროსთვის ისეთი მოქმედებების აკრძალვა, რომლებიც დაუკავშირდება კონსერვატორიის რექტორის არჩევნებს, კონსერვატორიის მმართველი ორგანოების დაკომპლექტებასა და მათ უფლებამოსილებაში ჩარევას.

აღნიშნული შუამდგომლობები თბილისის საქალაქო სასამართლოს 2023 წლის 3 ოქტომბრის განჩინებით არ დაკმაყოფილდა.

ზემოაღნიშნულის შედეგად ცხადია, რომ:

– მინისტრის 25 სექტემბრის ბრძანება რჩება ძალაში და კონსერვატორიის რექტორის არჩევნები ვერ ჩატარდება, თუ კონსერვატორია სათანადო სამართლებრივ დოკუმენტაციას კანონთან შესაბამისობაში არ მოიყვანს;

– კონსერვატორიის ზოგიერთმა წარმომადგენელმა 29 სექტემბრის შეხვედრაზე, სავარაუდოდ, აირჩია მოჩვენებითი თანამშრომლობის გზა, რითაც შეეცადა დროის მოგებას იმ იმედით, რომ სასამართლო მინისტრის ბრძანების მოქმედებას შეაჩერებდა და რექტორის არჩევნები ჩატარდებოდა არაერთი სამართლებრივი ხარვეზით, როგორც მოხდა წარსულში, კერძოდ, 2019 წელს;

– როგორც ჩანს, კონსერვატორიაში გარკვეულმა ძალებმა საბოლოოდ აირჩიეს სამინისტროსთან კონფრონტაციის გზა.

სამინისტრო, როგორც კონსერვატორიის ზედამხედველი უწყება, აცხადებს, რომ მისთვის უპირატესი კონსერვატორია და მისი ინტერესებია. ის არ დაუშვებს, რომ პირთა მცირე ჯგუფმა კონსერვატორიის განვითარებას ხელი შეუშალო – აღნიშნულია სამინისტროს განცხადებაში.