რასაც ეს ადამიანები ღონისძიებას არქმევენ, სინამდვილეში იყო „ნაციონალური მოძრაობის“ პოლიტიკური ქელეხი - ამის შესახებ საპარლამენტო უმრავლესობის წევრი ალუდა ღუდუშაური „ნაციონალური მოძრაობის“ გუშინდელ ღონისძიებას „მასკარადს“ უწოდებს.

ღუდუშაურის თქმით, ენმ-ს ვერანაირი მანიფესტი ვერ უშველის და ყველაზე დიდი ოპოზიციური პარტიის წარმომადგენლებს ურჩევს, ქუდი დაიხურონ და სახლში წავიდნენ.

„რასაც ეს ადამიანები ღონისძიებას არქმევენ, სინამდვილეში იყო არც მეტი არც ნაკლები „ნაციონალური მოძრაობის“ პოლიტიკური ქელეხი. რა მომავალი უნდა ჰქონდეს ამ ორგანიზაციას, რომლის წარმომადგენლებმაც კვლავ ვერ გაიაზრეს, რა ბოროტება დაატეხეს ჩვენს ქვეყანას და მეტიც, ჩვენი ხალხისთვის აქამდე ბოდიშიც კი არ მოუხდიათ. ამის ნაცვლად, იკრიბებიან და ამ მასკარადს აწყობენ, რა ეზეიმებათ ამ უბედურებს?! რა აქვთ საზეიმო, როცა მათი მმართველობა ხალხმა შეაფასა როგორც ისტორიის სირცხვილი.

ვერანაირი ვითომ მანიფესტი და ვერანაირი ვითომ აქტივობა ვერაფერს კარგს ვერ მოუტანს "ნაციონალურ მოძრაობას", რადგან ეს ადამიანები აცდენილები არიან ქართველი ხალხის ინტერესს. ვერც მანიფესტი ვერც ვერაფერი ვერ გადაარჩენთ. ერთადერთი, მათ რაც გადაარჩენთ, პოლიტიკურად უნდა დაიხურონ ქუდი და წავიდნენ სახლში , - განაცხადა ღუდუშაურმა.

ღუდუშაური ასევე მიხეილ სააკაშვილზეც საუბრობს და მას „მტარვალის“ , სამარცხვინოს და მორალისგან დაცლილი პერსონას უწოდებს.

მისი თქმით, საქართველოს მესამე პრეზიდენტი ნომერ პირველი ცრუპენტელაა, რომლის ანალოგი მსოფლიოს არ ჰყავს.

„სრული ბოდვაა, რომ თურმე 7 ნოემბერი ყოფილა პროვოკაცია, მისი რეჟიმის მმართველობაც ყოფილა პროვოკაცია. იქამდე მივა ეს არასერიოზული, სამარცხვინო, უთავმოყვარეო, მორალისგან დაცლილი პერსონა, ბოლოს იტყვის, რომ თვითონაც „ფეიკია" და რუსული პროექტი. ურთიერთგამომრიცხავი განცხადებები გვესმის მისგან, ხან ქართული დაავიწყდა, ხან პოლიტიკიდან მიდის, ორი წელია კვდება და აქვს განუკურნებელი სენი, რეალურად ეს ყველაფერი საპნის ბუშტივით გასკდა. ეს ადამიანი ნომერ პირველი ცრუპენტელაა, რომლის ანალოგი მსოფლიოს არ ჰყავს. დარწმუნებული ვარ, ის შევა (ისტორიაში) როგორც კლასიკური მაგალითი იმისა, თუ როგორი არ უნდა იყოს არამარტო პოლიტიკოსი ზოგადად, არამედ როგორი არ უნდა იყოს ზოგადად მამაკაცი, კაცობაზე ხომ ზედმეტია ლაპარაკი. რეებს ბოდავს, რეები გვესმის, თავის თავს რა დღეში აგდებს, ვაჟკაცობაც არ ყოფნის აღიაროს, რომ არის მხდალი“, - განაცხადა ღუდუშაურმა.