"ვაფასებ უკრაინასთან თქვენს სოლიდარობას" - ზელენსკი ზურაბიშვილს
ჰოლოდომორის ხსოვნის დღეს საქართველოს პრეზიდენტი უკრაინას სოლიდარობას უცხადებს. სალომე ზურაბიშვილი სოციალურ ქსელში წერს, რომ მჩაგვრელი პრაქტიკებისადმი წინააღმდეგობა ჩვენ საერთო მოვალეობად რჩება.
ჰოლოდომორის ხსოვნის დღეს უკრაინასთან სოლიდარობას გამოვხატავ. ჩვენ პატივს ვცემთ საბჭოთა რეჟიმის ტერორის მსხვერპლს.
90 წლის შემდეგ, მჩაგვრელი პრაქტიკებისადმი წინააღმდეგობა ჩვენ საერთო მოვალეობად რჩება, რათა უზრუნველვყოთ, რომ ისტორია არ განმეორდეს, - წერს ზურაბიშვილი.
პოსტის კომენტარებში საქართველოს პრეზიდენტს უკრაინელი კოლეგა ვოლოდიმირ ზელენსკი ეხმაურება.
ვაფასებ უკრაინასთან თქვენს სოლიდარობას ჰოლოდომორის ხსოვნის დღეს. ჩვენმა ერებმა მოსკოვის აგრესიული პოლიტიკით გამოწვეული ბევრი ტანჯვა გადაიტანეს. ერთმანეთს მხარი უნდა დავუჭიროთ, რათა ჩვენი თავისუფლება და ჩვენი ხალხი დავიცვათ, - წერს ზელენსკი.
