"ხელმომწერი ორგანიზაციები, ვეხმიანებით აქტივისტ ნატა ფერაძის მიმართ გამოყენებულ არაპროპორციულ სანქციას და მოვუწოდებთ სააპელაციო სასამართლოს, გადახედოს საქალაქო სასამართლოს მიერ დადგენილ სახდელს," - ამ განცხადებას ხელს 16 არასამთავრობო ორგანიზაცია აწერს. 

მესამე სექტორის წარმომადგენლები საქალაქო სასამართლოს მოსამართლის გადაწყვეტილებას, რომ ნატა ფერაძეს 5-დღიანი პატიმრობა შეეფარდა, კრიტიკულად აფასებენ და არაპროპორციულ სასჯელად მოიხსენიებენ. 

ჩვენ, ხელმომწერი ორგანიზაციები, ვეხმიანებით აქტივისტ ნატა ფერაძის მიმართ გამოყენებულ არაპროპორციულ სანქციას და მოვუწოდებთ სააპელაციო სასამართლოს, გადახედოს საქალაქო სასამართლოს მიერ დადგენილ სახდელს.

თბილისის საქალაქო სასამართლოს მოსამართლემ, ნინო შჩერბაკოვმა სტალინის გამოსახულებისთვის საღებავის შესხმის გამო ნატა ფერაძეს 5-დღიანი ადმინისტრაციული პატიმრობა შეუფარდა. გადაწყვეტილება თბილისის სააპელაციო სასამართლოში გასაჩივრდება.

ეს სანქცია სამართალდარღვევად შეფასებული ფაქტის პროპორციულად ვერ ჩაითვლება. ადმინისტრაციულ სამართალდარღვევათა კოდექსის თანახმად, პატიმრობა დადგინდება და გამოიყენება მხოლოდ გამონაკლის შემთხვევებში. სამების საკათედრო ტაძარში სტალინის გამოსახულების განთავსების გამო არაძალადობრივი პროსტესტის გამოხატვის ამგვარი სიმძიმისა და ხანგრძლივობის სახდელით დასჯა ადამიანის უფლებათა ევროპული სასამართლოს მიერ დადგენილ პროპორციულობის სტანდარტებს არღვევს.

საგულისხმოა, რომ ნატა ფერაძის უკანონო დასჯა ერთხელ უკვე გახდა ადამიანის უფლებათა ევროპული სასამართლოს მსჯელობის საგანი, როდესაც აქტივისტების მიმართ გამოყენებული სანქცია სასამართლომ არათანაზომიერად შეაფასა. შესაბამისად, მოვუწოდებთ თბილისის სააპელაციო სასამართლოს, იხელმძღვანელოს მოქმედი საერთაშორისო კანონმდებლობით და მიიღოს ადამიანის უფლებების შესაბამისი გადაწყვეტილება, - წერია განცხადებაში.