"ზოგიერთი მოსამართლე, იქ, ვინც იყო მისული, ნებსით თუ უნებლიედ, ჩართული არის ანტისახელმწიფოებრივ კამპანიაში. კერძოდ, მათი ყველა ეს ქმედება მიმართულია იმისკენ, რომ შეფერხდეს საქართველოს ევროპულ კავშირში ინტეგრაციის პროცესი", - ამ განცხადებას უზენაესი სასამართლოს ყოფილი მოსამართლე ბესარიონ ალავიძე აკეთებს.

როგორც ალავიძე "პირველებთან" ამბობს, მოსამართლეთა კონფერენციაზე ვეტინგის სისტემის წინააღმდეგ გამოსვლები ქვეყნის ევროინტეგრაციას საფრთხეს უქმნის. 

ალავიძე საუბრობს "ქართული ოცნებისა" და ე.წ. სასამართლო კლანის გარიგებასა და ერთმანეთის წინაშე ვალდებულებების არსებობაზე:

„ქართული ოცნება“ არის ერთადერთი პოლიტიკური ძალა, რომელიც მხარს უჭერს კლანს და ამბობს, რომ სასამართლოში პრობლემები ჩვენ არ გვაქვს, ყველა სხვა სამოქალაქო სექტორი, პოლიტიკური ორგანიზაციები, საერთაშორისო ორგანიზაციები, უცხოელი პარტნიორები - ყველა ამბობს, რომ არის კრიტიკული სიტუცია. 
მათ უკვე წარმოეშვათ ეს ვალდებულებები ერთმანეთის მიმართ - ერთი მხრივ, კლანმა მიცემული პირობა შეასრულა, მეორე მხრივ, ხელისუფლება არის ვალდებული, რომ დაიცვას კლანი,“ - ამბობს ბესარიონ ალავიძე.

მოსამართლეთა კონფერენციაზე, რომელიც გუშინ ჩატარდა, იმსჯელეს ე.წ. ვეტინგის სისტემაზე, სადაც ლევან მურუსიძე ამტკიცებდა, რომ მოსამართლეები იყვნენ ერთსულოვნები, რომ ე.წ. ვეტინგი არ ემსახურება კეთილსინდისიერების შემოწმებას და მიმართულია სასამართლოს დამორჩილებისკენ.