ავტოკეფალიის აღდგენის დღე - სიონში მეუფე შიოს ქადაგებას დაესწრნენ პრეზიდენტი და პარლამენტის თავმჯდომარე. ასევე, იმყოფებოდნენ საპარლამენტო უმრავლესობის წევრები, მათ შორის "ხალხის ძალის" დეპუტატები.

ეს იყო პირველი შეხვედრა პარლამენტის თავმჯდომარესა და პრეზიდენტს შორის მას შემდეგ, რაც სალომე ზურაბიშვილმა საარჩევნო კოდექსში შესატან ცვლილებებს ვეტო დაადო, საპარლამენტო უმრავლესობამ დაძლია და პრეზიდენტის ნაცვლად კანონის ძალაში შესვლას ხელი პარლამენტის თავმჯდომარემ მოაწერა.

უცნობია, შედგა თუ არა კომუნიკაცია პრეზიდენტსა და პარლამენტის თავმჯდომარეს შორის.

შალვა პაპუაშვილმა "საარჩევნო კოდექსში" ცვლილების შესახებ კანონს ხელი მოაწერა. პარლამენტის თავმჯდომარის მიერ ხელმოწერილი დოკუმენტით, იცვლება ცესკოს თავმჯდომარისა და წევრების არჩევის წესი და უქმდება ოპოზიციის კვოტით ცესკოს მოადგილის თანამდებობა.