შიდა, მინი ფეოდალების დაკმაყოფილების მცდელობები - ასე ეხმაურება პარტია "საქართველოსთვის" წევრი ანა ბუჩუკური "ოცნების" ცვლილებებს საარჩევნო კანონდებლობაში, რომლითაც მმართველი პარტია მაჟორიტარული არჩევნების შეცვლილი ფორმით უკან დაბრუნებას ცდილობს.

ბუჩუკური საუბრობს ასევე საკრებულოებისთვის დაწესებული 40 პროცენტიანი ბარიერის გაუქმებაზეც და აცხადებს, რომ "ოცნებას" 40%-იანი ზღვრის არსებობის ეშინია.

ეს შიდა მინი ფეოდალების დაკმაყოფილების მცდელობებია. ამაზე ბევრად მნიშვნელოვანი ცვლილება არის მეორე კომპონენტი საკანონმდებლო ინიციატივისა. ეს კიდევ უფრო ღიმილისმომგვრელია, რადგან, ერთის მხრივ "ოცნება" გამოდის და საზოგადოებას, უფრო სწორად საკუთარ ამომრჩეველს და აქტივს უმტკიცებს, რომ 60%-იანი მხარდაჭერა აქვს თურმე, მაგრამ 40%-იანი ზღვრის არსებობის ეშინია. ეს არის დადასტურება იმის, რომ 30%-საც ვერ აღწევენ", - ამბობს ანა ბუჩუკური.

"ქართული ოცნება" მაჟორიტარებს ვერ ელევა და  მათ შეყვანას პარლამენტში კონსტიტუციის გვერდის ავლით ცდილობს.  2024-ის არჩევნების  პროპორციული წესით ჩატარება ქვეყნის მთავარი კანონით არის გარანტირებული, თუმცა ძალაუფლების შენარჩუნების მიზნით  ივანშვილის პარტიამ  ყველაფერი  გადაალაგა -  მაჟორიტარებს სახელს შეუცვლიან, დელეგატებს დაარქმევენ და ასე ჩაწერენ სიაში.   

იმის შიშით, რომ შესაძლოა მმართველი პარტიის კანდიდატებმა საკრებულებისთვის დაწესებული 40 პროცენტიანი ბარიერი ვერ გადალახონ, ამ შეზღუდვას საერთოდ აუქმებენ.  გამოსავალი აქაც მარტივად  მოძებნეს. საკრებულოს დეპუტატად ჩაითვლება ის ,ვინც არჩევნებში სხვებზე მეტ ხმას დააგროვებს, ოღონდ არ აქვს მნიშვნელობა რამდენს.