ევროპის საბჭოს ადამიანის უფლებათა ახალი კომისარი, მაიკლ ო’ფლაერტი პირველი სამუშაო ვიზიტით უკრაინას ეწვევა. ამის შესახებ ინფორმაციას ევროპის საბჭოს პრესსამსახური ავრცელებს.

„უფრო გადაუდებელს ვერაფერს წარმოვიდგენ, ვიდრე უკრაინაში რუსეთის სრულმასშტაბიანი შეჭრის შედეგებთან გამკლავებაა, რამაც ადამიანების საშინელი ტანჯვა და ნგრევა გამოიწვია“, - განაცხადა მაიკლ ო’ფლაერტიმ.

კომისარმა ასევე გამოავლინა სხვა სფეროები, რომლებშიც აუცილებელია ადამიანის უფლებების უფრო ძლიერი დაცვა, მათ შორის კლიმატის კრიზისი, ხელოვნური ინტელექტის მართვა, გამოხატვის თავისუფლება, მიგრაცია და სიძულვილის ენის მატება, მათ შორის ანტისემიტიზმი და ანტიმუსლიმური ძალადობა.

გარდა ამისა, კომისარმა ხაზგასმით აღნიშნა, რომ აპირებს ყურადღება გაამახვილოს ახალგაზრდობის საკითხებზე, სოციალურ და ეკონომიკურ უფლებებზე და ადამიანის უფლებათა დამცველებზე, ასევე გამოიყენოს თავისი მანდატი ადამიანის უფლებათა ევროპული სასამართლოს გადაწყვეტილებების განხორციელების ხელშეწყობისთვის.