"ევროოპოტიმისტების" ლიდერი, რომან გოცირიძე პარლამენტში სავალდებულო გენდერული კვოტირების გაუქმებას ხელისუფლების მხრიდან მნიშვნელოვანი თემების უკანა პლანზე გადაწევის მცდელობად აფასებს - დეპუტატი პირდაპირ ამბობს, რომ "ოცნების" მიზანი ქალების მოტყუება და მათი ემანსიპაციისთვის ხელის შეშლაა.

გოცირიძის თქმით, ქართველი ოლიგარქის გუნდი უნდა დაისაჯოს, რომლის კანონიერი ფორმაც არჩევნების გზით მმართველი პარტიის "პოლიტიკურ მოუსავლეთში" გასტუმრებაა.

ამ კანონის მიღებას აქვს ორი მიზანი, პირველი, კიდევ ერთი დამატებითი წინააღმდეგობის თემა შემოიტანონ ევროკავშირთან დასაპირისპირებლად. ეს იყო საარჩევნო კანონმდებლობაში ცვლილებების შეტანა ცესკოსთან დაკავშირებით, ეს არის სხვა კანონები, რომლებიც 9 რეკომენდაციით არის მოთხოვნილი, ეს არის რუსული კანონის უკან შემობრუნება და ეს არის ევროკავშირში გაწევრიანების მოთხოვნის ერთ-ერთი მნიშვნელოვანი პუნქტის, გენდერული თანასწორობისა და ასევე, საარჩევნო კანონმდებლობის გაუარესება, ვინაიდან ეს არის საარჩევნო საკითხი, სადაც უარესდება დღეს არსებული მდგომარეობა. თქვენ, ფაქტობრივად, მოატყუეთ ქვეყნის ამომრჩეველი, მოატყუეთ ქალები, ღირსი ხართ, რომ არც ერთმა ქალმა არ დაგიჭიროთ მხარი. მე „გირჩს“ არ ვგულისხმობ, მას ისედაც არავითარი საარჩევნო პრეტენზია არ აქვს. ქალების მიერ უნდა დაისაჯოთ არჩევნებში თქვენ, ვინაიდან სამი წლის წინ თქვენ აცხადებდით, რომ ეს კანონი 2028 წელს კიდევ უფრო გაუმჯობესდებოდა, 2032 წლის შემდეგაც იმუშავებდა. თქვენ, ფაქტობრივად, ქალთა თავისუფლებას, ემანსიპაციას, მათ ეკონომიკურ გაძლიერებას უშლით ხელს. რეგიონებში ქალთა უფლებების დათრგუნვას უწყობთ ხელს. როდესაც ევროპულობით ასაბუთებდით ამ კანონის მიღებას, დღეს უკვე ავლენთ ანტიევროპულ ქმედებებს. უნდა დაისაჯოთ და დასჯის ყველაზე მარტივი და კანონიერი ფორმა არის არჩევნებში ამ პარტიის გასტუმრება პოლიტიკურ მოუსავლეთში“,- განაცხადა რომან გოცირიძემ.

ვრცლად ნახეთ - "გირჩი" გენდერული კვოტირების გაუქმების ინიციატივით გამოდის და "ოცნებასთან" თანამშრომლობას არ გამორიცხავს.