შეერთებული შტატების სახელმწიფო დეპარტამენტის პრესსპიკერის პასუხი საქართველოს პრემიერს -  მეთიუ მილერს მედიამ ჰკითხა, რას ფიქრობს ირაკლი კობახიძის განცხადებაზე, რომლის მიხედვითაც, აშშ სანქციების დაწესებით "კრიტიკულ ზღვარს მიუახლოვდა".

მხოლოდ ამას ვიტყვი: ამერიკაში, ზოგიერთი სხვა ქვეყნისგან განსხვავებით, დემოკრატიულად არჩეული მთავრობაა, რომელიც პოლიტიკურ გადაწყვეტილებებს თავად იღებს და არავინ სხვა", - ასე პასუხობს შეერთებული შტატების სახელმწიფო დეპარტამენტის პრესსპიკერი აღნიშნულ კითხვას. 

საქართველოს პრემიერ-მინისტრი ირაკლი კობახიძე 17 სექტემბერს, აშშ-ის ელჩს, რობინ დანიგანს შეხვდა. მთავრობის პრესსამსახურის მიერ გავრცელებულ განცხადებაში წერია, რომ მთავრობის მეთაურმა აშშ-ის ახალ სანქციებზე საუბრისას თქვა, რომ "აშშ კრიტიკულ ზღვარს მიუახლოვდა“. 

60-ზე მეტი სანქცირებული: 

• ამერიკის შეერთებულმა შტატებმა "ქართული ოცნების" მაღალჩინოსნებს და მმართველ პარტიასთან დაკავშირებულ პირებს ახალი სანქციები გუშინ დაუწესა. 
• ძალოვანი უწყების წარმომადგენლები და პრორუსული პარტიის ლიდერები, "რომლებიც ძირს უთხრიან ფუნდამენტურ თავისუფლებებს, მათ შორის, გამოხატვის თავისუფლებას" ე.წ. მაგნიტსკის სიაში დაამატეს. 

ხაზინის საგარეო აქტივების კონტროლის დეპარტამენტმა ახალი სანქციები 4 პირს დაუწესა:

• განსაკუთრებულ დავალებათა დეპარტამენტის უფროსი - ზვიად ხარაზიშვილი
• განსაკუთრებულ დავალებათა დეპარტამენტის უფროსის მოადგილე - ლაგაზაური მილერი 
• პრორუსული "ალტ-ინფოს" ლიდერი - კონსტანტინე მორგოშია
• პრორუსული "ალტ-ინფოს" ლიდერი - ზურაბ მახარაძე

აშშ-ს სახელმწიფო ხაზინის გარდა, სახელმწიფო დეპარტამენტმა 60-ზე მეტ პირს, მათ შორის, "ქართული ოცნების" ხელისუფლების წარმომადგენლებს და მათი ოჯახის წევრებს, სავიზო შეზღუდვები დაუწესა.