"ერთიანობის" ლიდერი გიგი წერეთელი ამბობს, რომ "ქართული ოცნების" პოლიტიკიდან გამომდინარე, სერგეი ლავორის განცხადება მისთვის მოულოდნელი არ იყო. ოპოზიციონერი ლიდერის თქმით, იმ პირობებში, როდესაც საქართველოს ხელისუფლება ოკუპანტს არცერთ პლატფორმაზე სათქმელს არ ეუბნება, ის თავის აგრესიულ პოლიტიკას ჯიუტად გააგრძელებს. 

მთელი ეს პოლიტიკა, რასაც დღეს საქართველოს ხელისუფლება აწარმოებს, არის სწორედ რუსეთის ინტერესების გამომხატველი, ზუსტად ჯდება იმ გზავნილებში, რომელიც აქვს კრემლს და ეს არის ამ პოლიტიკის შედეგი. როდესაც შენ პრინციპულად არ უპირისპირდები პოზიციას, რომ შენი ქვეყანა არის ოკუპირებული და ოკუპანტს არ ეუბნები სათქმელს არსად, არც გაეროს ტრიბუნიდან და არც საკუთარი კაბინეტებიდან, რა თქმა უნდა, იქნება ამგვარი განცახდებები და ჯიუტად გაგრძელდება ის ხაზი, რომელსაც რუსეთი აგრძელებს, - ამბობს გიგი წერეთელი. 
 

ივანიშვილის დაანონსებული ბოდიშის შემდეგ რუსეთი ისევ საქართველოს ხელისუფლებას აქებს. ოკუპანტი ქვეყნის საგარეო საქმეთა მინისტრი ამტკიცებს, რომ აფხაზ და ოს ხალხებთან მიმართებით "ქართული ოცნება" წარსულს ადექვატურად აფასებს. ამასთან, სერგეი ლავროვი აცხადებს, რომ რუსეთი მზადაა, დაეხმაროს მათ ურთიერთობების ნორმალიზებაში და ხაზს უსვამს, რომ იგულისხმება თავდაუსხმელობის შეთანხმების უზრუნველყოფაც.