მამუკა ხაზარაძე: ანაკლიის პორტის თანამესაკუთრეები საქართველოს მოქალაქეები გახდებიან
არჩევებამდე ხუთი დღით ადრე, კოალიცია "ძლიერი საქართველოს" ლიდერი მოქალაქეებს მიმართავს. მამუკა ხაზარაძე ამბობს, რომ მათი გეგმის მიხედვით, ანაკლიის პორტის თანამესაკუთრეები საქართველოს მოქალაქეები გახდებიან.
„[კოალიციური მთავრობის შექმნიდან] პირველ სამ კვირაში ჩვენ დაჩქარებული წესით შევიტანთ შესწორებებს კანონში და მოხდება ჩინეთის კომუნისტური პარტიის კონტროლირებადი, სახელმწიფო კომპანიის ჩამოშორება პროექტიდან. ამის შემდეგ, ჩვენ ხელახლა ჩავატარებთ ანაკლიის პორტის ტენდერს, რათა შეირჩეს დასავლური, მაღალი რეპუტაციის მქონე კომპანია და ანაკლიის პორტის მშენებლობა სწრაფად დასრულდეს.
აქვე მინდა გითხრათ, ჩვენი გეგმის მიხედვით, ანაკლიის პორტის თანამესაკუთრეები საქართველოს მოქალაქეები გახდებიან. რაც ნიშნავს იმას რომ ანაკლიის პორტის აქციების შეთავაზება მოხდება ჩვენი თანამოქალაქეებისთვის. ანაკლიის პორტის, ანაკლია სიტის და სხვა მეგაპროექტების დაწყებით, საქართველოში ათიათასობით სამუშაო ადგილი შეიქმნება.
ანაკლიის პროექტი იქნება არა მხოლოდ საქართველოსთვის ისტორიული ფუნქციის დაბრუნება, არამედ ქვეყნის ძირითადი დოვლათის და სამუშაო ადგილების შემქმნელი ეროვნული და საერთაშორისო მნიშვნელობის პროექტი”, - განაცხადა ხაზარაძემ.
