საქართველოს პარლამენტის თავმჯდომარე ამტკიცებს, რომ ევროინტეგრაცია არც შეჩერებულა. შალვა პაპუაშვილმა დღეს გამართულ ბრიფინგზე ჟურნალისტებს უთხრა, რომ ეს პროცესი "ვერც შეჩერდება". 

საპირისპირო თქვა გუშინ, 30 ოქტომბერს, ევროკავშირის ელჩმა, პაველ ჰერჩინსკიმ: "მთავრობის კურსის გამო, EU-ის ლიდერებმა საქართველოს გაწევრიანების პროცესი შეაჩერეს".

შალვა პაპუაშვილი დღეს ამტკიცებდა, რომ ევროკავშირის ზოგიერთი წარმომადგენლის მხრიდან პროცესის "უკიდურესად პოლიტიზების მცდელობას" ხედავს: 

ევროკავშირის ზოგიერთი წარმომადგენლის მხრიდან ვხედავთ ამ პროცესის უკიდურესად პოლიტიზების მცდელობას, ყველამ უნდა გააცნობიეროს, რომ ამგვარი წინდაუხედავი მიდგომა ევროინტეგრაციას თანამშრომლობის ინსტრუმენტიდან პოლიტიკურ იარაღად აქცევს, რაც სამწუხაროდ, საბოლოო ჯამში, თავად ევროინტეგრაციის პროცესს და ევროკავშირის რეპუტაციას აზიანებს. აქვე, მინდა შევეხო ამ ბოლო დროს ხშირად გამოყენებულ ტერმინს - ევროინტეგრაციის შეჩერება, გაყინვა, თუ სხვა მსგავსი ტერმინები.

თავად ის ფაქტი, რომ ევროკომისიამ გაფართოების დოკუმენტზე იმუშავა, საქართველოს პროგრესი შეაფასა და რეკომენდაციები მოგვცა, მეტყველებს იმაზე, რომ ეს ტერმინი უფრო პოლიტიკური განცხადებაა, ვიდრე ინსტიტუციური მდგომარეობა. როგორც ევროკავშირი აგრძელებს საქართველოს შეფასებას, ასევე ვაგრძელებთ ჩვენც ასოცირების შეთანხმებით გათვალისწინებულ საკითხებზე მუშაობას. სწორედ ეს არის ევროინტეგრაცია, ის არც შეჩერებულა და ვერც შეჩერდება. თუ რამე გვასწავლა ჩვენმა მიღწევებმა ამ პროცესებში, არის ის, რომ ევროინტეგრაცია გრძელვადიან შედეგზე ორიენტირებული სამუშაოა და არა იმწუთიერი პოლიტიკური კონიუნქტურის აყოლა"- თქვა მან.