საქართველომ ევროპის გაწვდენილი ხელი არ მიიღო - რასა იუკნევიჩიენე

20.03.21 13:01
საქართველომ ევროპის გაწვდენილი ხელი არ მიიღო -  რასა იუკნევიჩიენე

საქართველომ ევროპის გაწვდენილი ხელი არ მიიღო - კიდევ ერთი გავლენიანი ევროპარლამენატარი ოპოზიციასა და მმართველ პარტიას შორის ჩაშლილ მოლაპარაკებაზე პასუხისმგებლობას ხელისუფლებას აკისრებს.

რასა იუკნევიჩიენე "ამერიკის ხმასთან" ინტერვიუში ამბობს, რომ მას აქვს წუხილი და შეშფოთების მიზეზი საქართველოს მომავალთან დაკავშირებით. ევროპის სახალხო პარტიის ბლოკის წევრი ლიეტუვიდან ფიქრობს, რომ შეთანხმების გარეშე დასრულებულმა მოლაპრაკებებმა ეჭვი გაუმყარა იმის შესახებ, რომ ბიძინა ივანიშვილსთვის ევროატლანტიკური ინტეგრაცია არაფერს ნიშნავს.

ნამდვილად ველოდი, რომ ქართული სახელმწიფო და ქართული პოლიტიკური ელიტა გამოიყენებდა ამ შანსს, როცა ძალიან მაღალი დონის ევროპელი ლიდერების ჩართულობით, ამგვარი მოლაპარაკებები დაიწყო. ეს იყო ძალიან მნიშვნელოვანი მედიაციის პროცესი ევროპის მხრიდან, რაც იმას ნიშნავს, პირველ რიგში, რომ საქართველო მარტო არ არის. ის ბევრს ნიშნავს ევროპისთვის, ევროკავშირისთვის და ჩემი ჩათვლით, მას ევროპის კონტინენტზე მნიშვნელოვან ქვეყნად განვიხილავთ. ეს არის სახელმწიფო, რომელსაც დღემდე მოვიაზრებდით, როგორც ლიდერს რეგიონში დემოკრატიული რეფორმების და ევროპასთან პარტნიორობის კუთხით. მაგრამ, ხუთშაბათის შემდეგ, მე იმედგაცრუებული დავრჩი.

მაქვს ბევრი წუხილი და შეშფოთების მიზეზი საქართველოს მომავალთან დაკავშირებით. არ ვიცი, რა მოხდება ახლა, მაგრამ, მსგავს შემთხვევებში, მოლაპარაკების პროცესის შედეგზე მთელი პასუხისმგებლობა მმართველ პარტიას, მთავრობას ეკისრება, რამეთუ მას გააჩნია ყველა რესურსი. ის აკონტროლებს საგარეო საქმეთა სამინისტროს, და გავლენა აქვს პრეზიდენტის ინსტიტუტზე. ვიტყოდი, რომ საქართველოს პრემიერ-მინისტრს, მის გუნდს, ამ მოლაპარაკებების წარუმატებლობაში უდიდესი პასუხისმგებლობა ეკისრება. ხელი, რომელიც ევროპამ საქართველოს გაუწოდა, ქვეყანამ არ მიიღო, - თქვა რასა იუკნევიჩიენემ.

შეგახსენებთ, შარლ მიშელის პირადი წარმომადგენლის, კრისტიან დანიელსონის მედიაციით, მმართველ გუნდსა და ოპოზიციას შორის შეთანხმება ვერ შედგა და მოლაპარაკებები ჩაიშალა.