ანაკლიის ღრმაწყლოვან პორტთან დაკავშირებით "ქართული ოცნების" მიერ მამუკა ხაზარაძეზე მიტანილ იერიშს კოალიცია "ძლიერი საქართველოს" ლიდერი განცხადებით პასუხობს.

მამუკა ხაზარაძე სოციალურ ქსელში წერს, რომ ივანიშვილის რეჟიმის ბრალდება, რომ ანაკლიის პორტის პროექტი ჩააგდო, მორიგი პროპაგანდისტული ტყუილია. 

“ქართული ოცნების” მორიგი პროპაგანდისტული ტყუილი მათ მიერ გაჩერებული ანაკლიის პროექტის გარშემო. 

საერთაშორისო არბიტრაჟის მომსახურებაში 600.000 დოლარი გადაიხადა ანაკლიის განვითარების კონსორციუმმა, სადაც ამერიკელი და ევროპელი ინვესტორები არიან და არა მამუკა ხაზარაძემ. 

ახლა “ქართულმა ოცნებამ” უნდა გაასაჯაროვოს რამდენი ათეული მილიონი ლარი, ანუ, გადასახადის გადამხდელთა და ბიუჯეტის თანხა დახარჯა ანაკლიის გაჩერებაში, ამავე არბიტრაჟის მიმდინარეობის დროს მიღებულ იურიდიულ მომსახურებაში. 

მარტივად ვიტყვი რაც იყო: 

• არბიტრაჟმა თქვა, რომ ხელისუფლება მოიქცა ყაჩაღურად და ეს მეორე მხარემ იცოდა, შესაბამისად, პასუხისმგებლობა მასზეა, რომ რუსულ მთავრობასთან აფორმებდა კონტრაქტს.
• "ანაკლიას" რომ წაეგო, მაშინ მას არბიტრაჟი დააკისრებდა მილიონების გადახდას სახელმწიფოს სასარგებლოდ (გაწეული საადვოკატო მომსახურების ხარჯების ჩათვლით).
• ეს რომ ჯარიმა იყოს, გადახდილი იქნებოდა ბიუჯეტის სასარგებლოდ. თუ ეს ასეა, წარმოადგინონ შესაბამისი მტკიცებულება. 

ეს იყო მომსახურების მოსაკრებელი, ისეთივე, როგორსაც ქართულ სასამართლოებში იხდის ჩვენი ყველა მოქალაქე. 

აქვე შეგახსენებთ, რომ ივანიშვილმა გააჩერა ანაკლიის პროექტი, რომელიც 2020-ში უკვე მზად იქნებოდა პირველი გემის მისაღებად. 

ასევე “ქართულმა ოცნებამ” 80 მილიონ დოლარზე მეტი ღირებულების ამერიკული და ევროპული კომპანიების ინვესტიციის კონფისკაცია მოახდინა.

ახლა  ისმის კითხვა - შვიდ წელიწადში ანაკლიის გაჩერების შემდეგ, რატომ ვერ იპოვეს ინვესტორი და რატომ ვერ ააშენეს ანაკლიის პორტი?

და ბოლოს, რატომ დასჭირდა "ოცნებას" ამ საკითხის ახლა წამოწევა, როცა ეს მომსახურების თანხა წინა წელს იქნა გადახდილი?" - წერს ხაზარაძე.

ახალი შეტევა მამუკა ხაზარაძეზე -  ივანიშვილის პარტიის ლიდერები თავს კოალიცია “ძლიერ საქართველოს“ ესხმიან. დაპირისპირების მიზეზი ამჯერად ანაკლიის პორტია. 

“ძლიერი საქართველოს“ ლიდერმა მოითხოვა ანაკლიაში ამერიკელი ინვესტორების შემოსვლა და პორტის ამერიკული დაფინანსებით აშენება. მისი თქმით, ამერიკული ინტერესები ანაკლიის პორტში, საქართველოსთვის მეტ უსაფრთხოებას და მყარ გარანტიებს ნიშნავს, თუმცა აღმოჩნდა, რომ ასე არ ფიქრობს კობახიძე, რომელმაც განაცხადა, რომ "თავის დროზე ხაზარაძე იყო პასუხისმგებელი ინვესტორების მოზიდვაზე და მას ჰქონდა სრული თავისუფლება, შეეძლო ამერიკელი, ევროპელი, ჩინელი და ნებისმიერი ინვესტიციების მოზიდვა".