მედიკამენტები, რომლებიც მსოფლიოში ასეულობით ბავშვს დაეხმარა, საქართველოში არ შემოვა - რას პასუხობენ მშობლები სარჯველაძეს
დიუშენის სინდრომის მქონე ბავშვების მშობლები პროტესტს აგრძელებენ — ჯანდაცვის სამინისტროს პოზიცია მათთვის მიუღებელია.
ჯანდაცვის მინისტრმა, მიხეილ სარჯველაძემ, მძიმე გენეტიკური დაავადების მქონე მოზარდების მშობლების მოთხოვნას მედიკამენტების ქვეყანაში შემოტანასთან დაკავშირებით უარი უთხრა. მისი განცხადებით, მოთხოვნილი პრეპარატების ეფექტიანობა დამატებით შეფასებას საჭიროებს და მათი ფუნქცია, ძირითადად, დაავადების პროგრესის დროებით შენელებას უკავშირდება.
მინისტრის თქმით, ამ ეტაპზე ძვირადღირებული მედიკამენტების შემოტანა არ იგეგმება, რაც პროტესტის მონაწილე მშობლებისთვის მიუღებელია. დიუშენის სინდრომის მქონე ბავშვების ოჯახები აცხადებენ, რომ ჯანდაცვის სამინისტროს პასუხი არ აკმაყოფილებთ და აქციებს გააგრძელებენ.
„არ იქნება წამალი — არ შეწყდება პროტესტი“ — აცხადებენ მშობლები, რომლებიც შვილების სიცოცხლის გახანგრძლივებისთვის იბრძვიან. მათი თქმით, მოთხოვნილი პრეპარატები საერთაშორისო რეგულაციების შესაბამისად არის ავტორიზებული და უკვე გამოიყენება ევროპისა და ამერიკის ქვეყნებში.
ოჯახები ხაზს უსვამენ, რომ დროული მკურნალობა კრიტიკულად მნიშვნელოვანია — მედიკამენტების ადრეულ ეტაპზე მიღება დაავადების პროგრესის შენელებას და პაციენტების სიცოცხლის ხარისხის გაუმჯობესებას უზრუნველყოფს.
ვრცლად ნახეთ დიანა ჩირგაძის რეპორტაჟში.
