დიუშენის კუნთოვანი დისტროფიის მქონე მოზარდების მშობლები "ქართული ოცნებისგან" პასუხებს ელოდებიან. იშვიათი დიაგნოზის მქონე პაციენტების მშობლებს აინტერესებთ, შეიძენს თუ არა სახელმწიფო წამალს, რომელიც მათი შვილების სიცოცხლის გასახანგრძლივებლად, ჯერ-ჯერობით ერთადერთ საშუალებად არის მიჩნეული.  

დედები უკვე 6 დღეა წვიმასა და ქარში მთავრობის ადმინისტრაციასთან პროტესტს მართავენ. მათი თქმით, იმის საშუალებაც კი არ მისცეს, რომ ადგილზე პლედები მიეტანათ.  

ქარში, წვიმაში დგანან მშობლები, მათ პლედებიც კი არ შემოატანინეს. დიუშენის დისტროფიით დაავადებული არის მხოლოდ 100 ბავშვი, საუბარია მხოლოდ მილიონ ლარზე. ბავშვებს სასიცოცხლოდ სჭირდებათ ეს წამალი. მთავრობამ უნდა ყურად იღოს ეს ყველაფერი, აუცილებლად უნდა შეხვდნენ მშობლებს და გაიგოს მათი ტკივილი. როცა ისინი საუბრობენ, რომ  შეიძლება ერთი და 5 წელი გახანგრძლივდესო, მშობლისთვის ერთი დღეც მნიშვნელოვანია. სიცოცხლეს ვერ ვეთამაშებით, სიცოცხლე არის ყველაზე ღირებული", - ამბობს მშობელი. 

დედები ამბობენ, რომ ჯანდაცვის მინისტრი ყურად არ იღებს მათი და მათი შვილებსი ტანჯვას - "რა გამოდის - ჯანტანჯვის მინისტრი". 

ერთი წლიდან სამ წლამდე რომ გადაავადებს ეს წამალი ეტლში ჩაჯდომას, ვერ ხვდება ჯანდაცვის მინისტრი, რომ ე.ი. ჯანმრთელობასაც ინარჩუნებს, გარდა იმისა, რომ ეტლში ჩაჯდეს? 

ანუ მისთვის ეს არ არის მნიშვნელოვანი? გამოდის რომ ჩვენი ჯანდაცვის მინისტრი სწირავს ხალხს ტანჯვისთვის. რა გამოდის - ჯანტანჯვის მინისტრი. არანაირი გამოხმაურება, მშვენივრად არიან კაბინეტებში გადანაწილებულები. თუ ბავშვებს არ მიხედავენ, აბა სხვა  უფრო პრიორიტეტი რა აქვთ? - ამბობს მშობელი. 

საქართველოში დიუშენის კუნთოვანი დისტროფიის დიაგნოზით 100-მდე ბავშვია აღრიცხული. ეს გენეტიკური დაავადებაა, რომელიც ადრეულ ასაკში კუნთების დასუსტებას და ფატალურ შედეგს იწვევს. მშობლები ერთი წელია ქვეყანაში ამ მომაკვდინებელი დაავადების სამკურნალო პრეპარატის შემოტანას უშედეგოდ ითხოვენ.