კანცელარიასთან დიუშენის კუნთოვანი დისტროფიით დაავადებული ბავშვების მშობლების აქცია გრძელდება. ისინი სახელმწიფოს შვილებისთვის სასიცოცხლოდ აუცილებელ მედიკამენტს სთხოვენ. 

აქციაში მონაწილე მშობლები ჯანდაცვის მინისტრის, მიხეილ სარჯველაძის დღევანდელ გამოსვლასაც გამოეხმაურნენ. "ჩაჯდეს სარჯველაძე 3 დღე ეტლში, რომ მიხვდეს რას გავდივართ" - ამბობენ მშობლები. 

გამოვიდა სარჯველაძე და თქვა, რომ მშობლებს აქვთ ტყუილი მოლოდინი ​და ეს პრეპარატი მხოლოდ 3 წლით გადაავადებს ეტლში ჩაჯდომას. მე მინდა, რომ 3 დღე ჩაჯდეს ეტლში ამოუსვლელად და შეადაროს ის სამი წელი და სამი დღე, როგორი იქნება მოლოდინი ეტლში ჩაჯდომისას. თვითონ ჩაჯდეს 3 დღე ეტლში, რომ მიხვდეს რას გავდივართ და რამდენს ნიშნავს ეგ სამი წელი ჩვენთვის.

რატომ არ შეგვიყვანეს პარლამენტში ერთი მშობელი მაინც, რომ ჩვენი აზრიც გაეგოთ და ჩვენგანაც მოესმინა ხალხს და საზოგადოებას," - ამბობს ერთ-ერთი მშობელი.

შეგახსენებთ, რომ ჯანდაცვის მინისტრი დღეს პარლამენტში ინტერპელაციის წესით იყო დაბარებული. პარტია "საქართველოსთვის" დეპუტატებს მასთან კითხვები დიუშენის დაავადეის მქონე ბავშვებისთვის მედიკამენტის შემოტანასთან დაკავშირებით ჰქონდათ.