გრიგოლ ლილუაშვილი საქალაქო სასამართლოს მიერ გამოცხადებულ განაჩენს სააპელაციო სასამართლოში გაასაჩივრებს - დაცვის მხარე ამბობს, რომ ყველა ინსტანციაში იბრძოლებენ სუს-ის ექს-შეფის უდანაშაულობის დასამტკიცებლად. 

ადვოკატები არ გამორიცხავენ, რომ საქმე სტრასბურგის სასამართლოშიც წავიდეს.

რაც შეეხება თავად უკვე მსჯავრდებულ ყოფილ მინისტრს, ლილუაშვილს დღეს არც ერთი სიტყვა არ უთქვამს - სუს-ის ექს-შეფი განაჩენის გამოცხადებას დუმილით შეხვდა.

დაცვის მხარეს და ბატონ ლილუაშვილს გამამართლებელი განაჩენის მოლოდინი ჰქონდა იქიდან გამომდინარე, რომ საქმეში არცერთი მტკიცებულება არ არსებობდა, რომელიც მის დანაშაულს რაიმე ფორმით დაამტკიცებდა. 

ბატონი გრიგოლ ლილუაშვილი აუცილებლად შეეცდება თავისი უდანაშაულობის სამართლებრივი გზით დამტკციებას და ჩვენ ამ განაჩენს აუცილებლად გავასაჩივრებთ სააპელაციოში.

როცა დგება გამამტყუნებელი განაჩენი, ქვეყანას და სასამართლოს უნდა ჰქონდეს იმის დაფიქრების რესურსი და იფიქროს, ეს ქვეყნისთვის რამდენად ხელშემწყობი იქნება", - ამბობს ადვოკატი ლანა ცერცვაძე. 

კორუფციულ დანაშაულში ბრალდებული, სუს-ის ყოფილი უფროსი, გრიგოლ ლილუაშვილი მოსამართლემ დამნაშავედ ცნო. ნინო თარაშვილმა ექს-მაღალჩინოსანს 13 წლიანი პატიმრობა განუსაზღვრა. 

უფრო კონკრეტულად: ლილუაშვილი დამნაშავედ იქნა ცნობილი ოთხივე ეპიზოდზე.

რას ედავებოდნენ ლილუაშვილს?

• ქარის ელექტროსადგურების მშენებლობის ლობირებისთვის თურქ ინვესტორ ჩაღათაი ულქერისგან $1 მლნ-ის აღებას, ეკონომიკისა და მდგრადი განვითარების მინისტრის იმჟამინდელი პირველი მოადგილის, რომეო მიქაუტაძის მეშვეობით;
• გაზიფიკაციის ტენდერებში დახმარების სანაცვლოდ, კომპანია „ექსპრესსერვისი 2008-ის“ დამფუძნებელ გიორგი ხაჟალიასგან 1,5 მლნ ლარის აღებას რომეო მიქაუტაძის მეშვეობით;
• 2021-2023 წლებში დანაშაულებრივი „ქოლცენტრების“ მფარველობას, საიდანაც ბრალდების ინფორმაციით, ლილუაშვილმა მიიღო $1 365 000;
• პროკურატურა ამბობს, რომ ლილუაშვილი ქრთამის სანაცვლოდ მფარველობდა თბილისის მერიის საბავშვო ბაგა-ბაღების მართვის სააგენტოს ყოფილ დირექტორს, კახა გვანცელაძეს, რომელიც გამოძიების ინფორმაციით,  ბაღების შესყიდვებიდან  „ატკატებს“ იღებდა.