ბაგა-ბაღის 14 აღსაზრდელი ციციშვილის ბავშვთა კლინიკაშია მოთავსებული  - ამის შესახებ "პირველებს" კლინიკის სამედიცინო დირექტორმა, მაია ჩხაიძემ განუცხადა.

როგორც ექიმი ამბობს, 14-ვე ბავშვი საავადმყოფოში პირ-ღებინებით შევიდა, მათი ნაწილის მდგომარეობა უკვე დამაკმაყოფილებელია.

"მძიმე მდგომარეობა არცერთ არ აქვს" - ამბობს კლინიკის სამედიცინო დირექტორი. 

ჩხაიძის ინფორმაციით, აღსაზრდელები სხვადასხვა ბაგა-ბაღიდან არიან. 

ჩვენთან მოთავსებულია 14 ბავშვი ამ ეტაპზე. რამდენიმე ბავშვის მდგომარეობა უკვე დამაკმაყოფილებელია, მაგრამ ჯერ-ჯერობით არ გავწერთ სახლში. მძიმე მდგომარეობა არცერთ არ აქვს. ღამის განმავლობაში ეტაპოვბრივად შემოდიოდნენ ღებინებით. სხვადასხვა ბაგა-ბაღების აღსაზრდელები არიან. 14-ვე ბავშვი გასტრო-ენტერიტით არიან შემოსულები. ვერაფერს ვერ დავუკავშირებთ ჯერ, რადგან გასტრო-ენტერიტი არის ეის, რაც შემიძლია ვთქვა, ჩვენ ხელთ არსებული კვლევებით ვერ დავადგენთ, რა იყო მიზეზი", - აცხადებს მაია ჩხაიძე. 

ბაგა-ბაღების სააგენტოს ცნობით, 7 ბაღში, სააღმზრდელო პროცესი ეპიდემიოლოგიური რისკების დაზღვევის მიზნით შეჩერდა.

• ფინანსთა სამინისტროს საგამოძიებო სამსახურმა თბილისში მდებარე 20 ბაგა-ბაღში 55 აღსაზრდელისა და 1 აღმზრდელის ინტოქსიკაციის ფაქტზე გამოძიება დაიწყო.

ინტოქსიკაციის გამო "პირველების" ინფორმაციით, შემდეგი ბაღები დაიკეტა: 

• 59-ე, 
• 124 -ე,
• 22-ე,
• 109-ე,
• 46 -ე,
• 121-ე,
• 79-ე.

რაც შეეხება ფინანსთა სამინისტროს საგამოძიებო სამსახურში დაწყებულ გამოძიებას გამოძიება მიმდინარეობს საქართველოს სისხლის სამართლის კოდექსის 198-ე მუხლის მეორე ნაწილით, ადამიანის სიცოცხლისათვის ან ჯანმრთელობისათვის საშიში პროდუქციის დამზადება-რეალიზაციის ფაქტზე, რამაც საფრთხე შეუქმნა ადამიანის სიცოცხლეს ან ჯანმრთელობას.

ირკვევა, რომ ჩხრეკა, მთელი ღამის განმავლობაში ინტენსიურად მიმდინარეობდა 4 ბაგა-ბაღსა და ბაგა-ბაღებისთვის საკვები პროდუქტების მიმწოდებელ 3 კომპანიაში. ამ ეტაპზე არსებული ინფორმაციით, ინტოქსიკაცია შესაძლოა ბაქტერიულ ინფექციას უკავშირდებოდეს, რომლის წყაროც, სავარაუდოდ, ბაგა-ბაღებში მიღებული საკვები პროდუქტია. კონკრეტულად რომელი პროდუქტი გახდა ინტოქსიკაციის გამომწვევი მიზეზი, შესაბამისი ექსპერტიზის შედეგად დადგინდება. 

 საგამოძიებო სამსახურის ინფორმაციით, თბილისში მდებარე 20 ბაგა-ბაღში 55 აღსაზრდელისა და 1 აღმზრდელის ინტოქსიკაციის ფაქტზე, შეტყობინების მიღებისთანავე, გამოძიება მყისიერად დაიწყო.