იაშვილის სახელობის ბავშვთა ცენტრალური საავადმყოფოში საბავშვო ბაღებში სავარაუდო ინტოქსიკაციის გამო მოთავსებული ბავშვების რაოდენობა გაზრდილია  და ის ამ ეტაპზე 13-ს შეადგენს. 

• გუშინ შუადღის მონაცემებით, კლინიკაში 7 ბავშვი იმყოფებოდა.

იაშვილის სახელობის ბავშვთა ცენტრალური საავადმყოფოს პედიატრიული განყოფილების ხელმძღვანელის, სოფიო ცერცვაძის თქმით, პაციენტების მდგომარეობა სტაბილურია.

„დღევანდელი მდგომარეობით, ჰოსპიტალში რჩება 13 პაციენტი. მათი კლინიკური მდგომარეობა სტაბილურია. პაციენტებს აღენიშნებოდათ გასტროინტესტინური ჩივილები. ამ ეტაპზე მათ უტარდებათ შესაბამისი მკურნალობა და მიმდინარეობს კლინიკური მდგომარეობის დინამიკაში შეფასება და მონიტორინგი“,- განაცხადა სოფიო ცერცვაძემ.

ცნობისთვის მოწამლული ბავშვების რაოდენობა გაზრდილია ციციშვილის კლინიკაშიც - როგორც "ტვ პირველს" კლინიკის სამედიცინო დირექტორმა, მაია ჩხაიძემ უთხრა, ციციშვილის კლინიკაში, გუშინ საღამოს დამატებით სამი პაციენტი მიიღეს. 

ბაღებში მოწამლული ბავშვების რიცხვმა, რომ 100-ს გადააჭარბა, ამის შესახებ დღეს ჯანდაცვის მინისტრმა, მიხეილ სარჯველაძემ  ჟურნალისტებს განუცხადა.

სარჯველაძის თქმით, სწორედ ამ რაოდენობის ბავშვის ჰოსპიტალიზაცია განხორიცელდა კლინიკებში ორი დღის განმავლობაში. მისივე განცხადებით, რეალურად რა მოხდა და რითი მოიწმალნენ ბავშვები, ამას ახლა გამოძიება გასცემს პასუხს.