იმ ფონზე, როცა კონკურენციისა სააგენტო აცხადებს, რომ სექტემბერში სასურსათო პროდუქტებისგან შემდგარი კალათა გაიაფდა, მოქალაქეები საპირისპიროზე საუბრობენ. გამოკითხულები ამბობენ, რომ ფასები მნიშვნელოვნად არის გაზრდილი, შემოსავალი მხოლოდ აუცილებელი პროდუქტებისთვის ჰყოფნით, ხორცისა და თევზის შეძენას კი ბევრი მათგანი ვეღარ ახერხებს. 

მომატებულია ფასები ძალიან. აი, ვერ ვაძლევ ჩემს თავს უფლებას, რომ ვიყიდო ის, რაც მინდა. რაც ძალიან აუცილებელია, იმას ვყიდულობ, მეშინია მაღაზიაში შესვლა. ხორცს ვერ ვყიდულობ, შეიძლება ძალიან იშვიათად ქათმის ცალკე ნაჭრები რომ იყიდება, ეგენი ვიყიდო. ძროხის ხორცს ვერ ვყიდულობ, მენატრება, მაგრამ ვერ ვყიდულობ, - ამბობს მოქალაქე. 

შევედი ბაზარში, ვერაფერი ვიყიდე და უკან გამოვედი. ხორცზე უკვე ლაპარაკი ზედმეტია, თევზზეც, საშინელი ფასებია, - ამბობს კიდევ ერთი მოქალაქე.

პენსიონერები ვართ, მაგრამ სულყუველაფერი ძვირია. იაფი არაფერი არ არის, - ამბობს ხალხი. 

ხალხი კატასტროფის ზღვარზეა მიყვანილი უკვე. ეს არ შეიძლება, მთავრობისგანე ს არ უნდა ხდებოდეს. ჯერ ერთი პენსია, მაგთ ნამუსი აქვთ 20 ლარს რომ უმატებენ პენსიონერებს?, - ამბობს კიდევ ერთი მოქალაქე. 

გაძვირებულია ყველაფერი, ძალიან ძნელია ცხოვრება. თუ არ მუშაობ, პენსიონერი კაცი ძნელად იცხოვრებს, - ამბობს მოქალაქე. 

საქართველოს კონკურენციის და მომხმარებლის დაცვის სააგენტო ამტკიცებს, რომ მთავრობის შექმნილი პორტალი ekalata.gov.ge-ის მიხედვით, რომელიც მარკეტების ფასებს აღრიცხავს, პროდუქტები სექტემბერში გაიაფდა.

სააგენტო ირწმუნება, რომ სასურსათო პროდუქტებისგან შემდგარი კალათის ღირებულება თვის დასაწყისში 37.45 ლარს შეადგენდა, ხოლო თვის ბოლოს 35.82 ლარამდე შემცირდა.